ಬಂದಿಹೆ ಜನನಿ ಮರಳಿ ನೀನು

ಶ್ರೀರಂಜಿನಿ -

ಬಂದಿಹೆ ಜನನಿ ಮರಳಿ ನೀನು
ಧರೆಯ ಪಾಪದ ಭಾರವ ಕಳೆಯೆ |
ದಗ್ಧ ಹೃದಯದ ಜ್ವಾಲೆಯನಾರಿಸೆ
ದುಃಖಿತರೆಲ್ಲರ ಕಣ್ಣೀರೊರಸೆ ||

ಮೋಹನ -

ಯುಗಯುಗದಲೂ ನೀ ಬರುವೆ ಧರೆಗೆ
ಯಾತನೆಗಳನು ಎನಿತೋ ಸಹಿಪೆ |
ಕಲ್ಲಾಗಿಹುದು ಹೃದಯವೆಮ್ಮದು
ಮರಳಿ ಮರಳಿ ಮರೆವೆವು ಧರ್ಮವ ||

ಸಹಾನ -

ಸಹನ-ಮೂರುತಿ ಸೀತೆಯ ರೂಪದಿ
ಬೋಧಿಸಿ ಅರುಹಿದ ಅಚಲ ಭಕ್ತಿಯ |
ರಾಧೆಯ ರೂಪದಿ ದರುಶನವಿತ್ತು
ಪ್ರೇಮದ ಮಹಿಮೆಯ ಪ್ರಚಾರಗೈದೆ ||

ಪುನ್ನಾಗವರಾಲಿ -

ರಾಮಕೃಷ್ಣಲೀಲೆ ಪೂರಣಗೈಯಲು
ಎಲ್ಲರ ತಾಯಿಯು ಆಗಿ ನೀ ಬಂದಿಹೆ |
ಪಾಪಿ ತಾಪಿಗಳ ಅಪಾರ ಶರಣು
ಸರ್ವರ ಆಶ್ರಯ, ಅರ್ಹರೇ ಎಲ್ಲ! ||

ಮಧ್ಯಮಾವತಿ -

ಭಯಾರ್ತ-ಭ್ರಾಂತ-ಅನಾಥರೆಮಗೆ
ಜನನಿ ಬಂದು ನೀ ಅಭಯವನಿತ್ತೆ |
ಮಾಯಾಮರೀಚಿಯ ದೂರವ ಮಾಡಿ
ಬೀರಿದೆ ಎಲ್ಲರ ಹೃದಯದಿ ಬೆಳಕ ||