ಸ್ತವಃ

ಶ್ರೀನಾಥೇ ಜಾನಕೀನಾಥೇ ಅಭೇದಃ ಪರಮಾತ್ಮನಿ |
ತಥಾಪಿ ಮಮ ಸರ್ವಸ್ವಂ ರಾಮಃ ಕಮಲಲೋಚನಃ ||

ಓಂ ಶ್ರೀರಾಮಚಂದ್ರಾಯ ನಮಃ ||

ವರ್ಣಾನಾಮರ್ಥಸಂಘಾನಾಂ ರಸಾನಾಂ ಛಂದಸಾಮಪಿ|
ಮಂಗಲಾನಾಂ ಚ ಕರ್ತಾರೌ ವಂದೇ ವಾಣೀವಿನಾಯಕೌ ||1||

ಭವಾನೀಶಂಕರೌ ವಂದೇ ಶ್ರದ್ಧಾವಿಶ್ವಾಸರೂಪಿಣೌ |
ಯಾಭ್ಯಾಂ ವಿನಾ ನ ಪಶ್ಯಂತಿ ಸಿದ್ಧಾಃ ಸ್ವಾಂತಸ್ಸ್ಥಮೀಶ್ವರಮ್ ||

ವಂದೇ ಬೋಧಮಯಂ ನಿತ್ಯಂ ಗುರುಂ ಶಂಕರರೂಪಿಣಮ್ |
ಯಮಾಶ್ರಿತೋ ಹಿ ವಕ್ರೋsಪಿ ಚಂದ್ರಃ ಸರ್ವತ್ರ ವಂದ್ಯತೇ||

ಸೀತಾರಾಮಗುಣಗ್ರಾಮ ಪುಣ್ಯಾರಣ್ಯವಿಹಾರಿಣೌ |
ವಂದೇ ವಿಶುದ್ಧವಿಜ್ಞಾನೌ ಕವೀಶ್ವರಕಪೀಶ್ವರೌ ||

ಉದ್ಭವಸ್ಥಿತಿಸಂಹಾರ ಕಾರಿಣೀಂ ಕ್ಲೇಶಹಾರಿಣೀಮ್ |
ಸರ್ವಶ್ರೇಯಸ್ಕರೀಂ ಸೀತಾಂ ನತೋsಹಂ ರಾಮವಲ್ಲಭಾಮ್ ||

ಯನ್ಮಾಯಾವಶವರ್ತಿ ವಿಶ್ವಮಖಿಲಂ ಬ್ರಹ್ಮಾದಿದೇವಾಸುರಾಃ
ಯತ್ಸತ್ತ್ವಾದಮೃಷೈವ ಭಾತಿ ಸಕಲಂ ರಜ್ಜೌ ಯಥಾsಹೇರ್ಭ್ರಮಃ |
ಯತ್ಪಾದಪ್ಲವ ಏಕ ಏವ ಹಿ ಭವಾಂಭೋಧೇಸ್ತಿತೀರ್ಷಾವಾತಂ
ವಂದೇsಹಂ ತಮಶೇಷಕಾರಣಪರಂ ರಾಮಾಖ್ಯಮೀಶಂ ಹರಿಮ್ ||

ಪ್ರಸನ್ನತಾಂ ಯಾ ನ ಗತಾಭಿಷೇಕತಃ
ತಥಾ ನ ಮಮ್ಲೌ ವನವಾಸದುಃಖತಃ|
ಮುಖಾಂಬುಜಶ್ರೀ ರಘುನಂದನಸ್ಯ ಮೇ
ಸದಾsಸ್ತು ಸಾ ಮಂಜುಲಮಂಗಲಪ್ರದಾ ||

ನೀಲಾಂಬುಜಶ್ಯಾಮಲಕೋಮಲಾಂಗಂ
ಸೀತಾಸಮಾರೋಪಿತವಾಮಭಾಗಮ್ |
ಪಾಣೌ ಮಹಾಸಾಯಕಚಾರುಚಾಪಂ
ನಮಾಮಿ ರಾಮಂ ರಘುವಂಶನಾಥಮ್ ||

ಮೂಲಂ ಧರ್ಮತರೋರ್ವಿವೇಕಜಲಧೇಃ ಪೂರ್ಣೇಂದುಮಾನಂದದಂ
ವೈರಾಗ್ಯಾಂಬುಜಭಾಸ್ಕರಂ ತ್ವಘಹರಂ ಧ್ವಾಂತಾಪಹಂ ತಾಪಹಮ್ |
ಮೋಹಾಂಬೋಧರಪುಂಜಪಾಟನವಿಧೌ ಖೇಸಂಭವಂ ಶಂಕರಂ
ವಂದೇ ಬ್ರಹ್ಮಕುಲಂ ಕಲಂಕಶಮನಂ ಶ್ರೀರಾಮಭೂಪಪ್ರಿಯಮ್ ||

ಸಾಂದ್ರಾನಂದಪಯೋದಸೌಭಗತನುಂ ಪೀತಾಂಬರಂ ಸುಂದರಂ
ಪಾಣೌ ಬಾಣಶರಾಸನಂ ಕಟಿಲಸತ್ ತೂಣೀರಭಾರಂ ವರಮ್ |
ರಾಜೀವಾಯತಲೋಚನಂ ಧೃತಜಟಾಜೂಟೇನ ಸಂಶೋಭಿತಂ
ಸೀತಾಲಕ್ಷ್ಮಣಸಂಯುತಂ ಪತಿಗತಂ ರಾಮಾಭಿರಾಮಂ ಭಜೇ ||

ಕುಂದೇಂದೀವರಸುಂದರಾವತಿಬಲೌ ವಿಜ್ಞಾನಧಾಮಾವುಭೌ
ಶೋಭಾಢ್ಯೌ ವರಧನ್ವಿನೌ ಶ್ರುತಿನುತೌ ಗೋವಿಪ್ರವೃಂದಪ್ರಿಯೌ|
ಮಾಯಮಾನುಷರೂಪಿಣೌ ರಘುವರೌ ಸದ್ಧರ್ಮವರ್ಮೌ ಹಿತೌ
ಸೀತಾನ್ವೇಷಣತತ್ಪರೌ ಪಥಿಗತೌ ಭಕ್ತಿಪ್ರದೌ ತೌ ಹಿ ನಃ ||

ಬ್ರಹ್ಮಾಂಭೋಧಿಸಮುದ್ಭವಂ ಕಲಿಮಲ ಪ್ರಧ್ವಂಸನಂ ಚಾವ್ಯಯಂ
ಶ್ರೀಮಚ್ಛಂಭುಮುಖೇಂದುಸುಂದರವರೇ ಸಂಶೋಭಿತಂ ಸರ್ವದಾ |
ಸಂಸಾರಾಮಯಭೇಷಜಂ ಸುಮಧುರಂ ಶ್ರೀಜಾನಕೀಜೀವನಂ
ಧನ್ಯಾಸ್ತೇ ಕೃತಿನಃ ಪಿಬಂತಿ ಸತತಂ ಶ್ರೀರಾಮನಾಮಾಮೃತಮ್ ||

ಶಾಂತಂ ಶಾಶ್ವತಮಪ್ರಮೇಯಮನಘಂ ನಿರ್ವಾಣಶಾಂತಿಪ್ರದಂ
ಬ್ರಹ್ಮಾಶಂಭುಫಣೀಂದ್ರಸೇವ್ಯಮನಿಶಂ ವೇದಾಂತವೇದ್ಯಂ ವಿಭುಮ್ |
ರಾಮಾಖ್ಯಂ ಜಗದೀಶ್ವರಂ ಸುರುಗುರುಂ ಮಾಯಾಮನುಷ್ಯಂ ಹರಿಂ
ವಂದೇಽಹಂ ಕರುಣಾಕರಂ ರಘುವರಂ ಭೂಪಾಲಚೂಡಾಮಣಿಮ್ ||

ಕೇಕೀಕಂಠಾಭನೀಲಂ ಸುರವರವಿಲಸದ್ವಿಪ್ರಪಾದಾಬ್ಜಚಿಹ್ನಂ
ಶೋಭಾಡ್ಯಂ ಪೀತವಸ್ತ್ರಂ ಸರಸಿಜನಯನಂ ಸರ್ವದಾಸುಪ್ರಸನ್ನಮ್ |
ಪಾಣೌ ನಾರಾಚಚಾಪಂ ಕಪಿನಿಕರಯುತಂ ಬಂಧುನಾ ಸೇವ್ಯಮಾನಂ
ನೌಮೀಡ್ಯಮ್ ಜಾನಕೀಶಂ ರಘುವರಮನಿಶಂ ಪುಷ್ಪಕಾರೂಢರಾಮಮ್ ||

ಅರ್ತಾನಾಮೂರ್ತಿಹಂತಾರಂ ಭೀತಾನಾಂ ಭಯನಾಶನಮ್ |
ದ್ವಿಷತಾಂ ಕಾಲದಂಡಂ ತಂ ರಾಮಚಂದ್ರಂ ನಮಾಮ್ಯಹಮ್ ||

ಶ್ರೀರಾಘವಂ ದಶರಥಾತ್ಮಜಮಪ್ರಮೇಯಂ
ಸೀತಾಪತಿಂ ರಘುಕುಲಾನ್ವಯರತ್ನದೀಪಮ್ |
ಆಜಾನುಬಾಹುಮರವಿಂದದಲಾಯತಾಕ್ಷಂ
ರಾಮಂ ನಿಶಾಚರವಿನಾಶಕರಂ ನಮಾಮಿ ||

ವೈದೇಹೀಸಹಿತಂ ಸುರದ್ರುಮತಲೇ ಹೈಮೇ ಮಹಾಮಂಡಪೇ
ಮಧ್ಯೇಪುಷ್ಪಕಮಾಸನೇ ಮಣಿಮಯೇ ವೀರಾಸನೇ ಸಂಸ್ಥಿತಮ್ |
ಅಗ್ರೇ ವಾಚಯತಿ ಪ್ರಭಂಜನಸುತೇ ತತ್ತ್ವಂ ಮುನಿಭ್ಯಃ ಪರಂ
ವ್ಯಾಖ್ಯಾಂತಂ ಭರತಾದಿಭಿಃ ಪರಿವೃತಂ ರಾಮಂ ಭಜೇ ಶ್ಯಾಮಲಮ್ ||