ಭುವನ ಮಂಡಲೇ ನವಯುಗಮುದಯತು

ಭುವನ ಮಂಡಲೇ ನವಯುಗಮುದಯತು ಸದಾ ವಿವೇಕಾನಂದಮಯಮ್ |
ಸುವಿವೇಕಮಯಮ್ ಸ್ವಾನಂದಮಯಂ ||ಪ||

ತಮೋಮಯಂ ಜನ ಜೀವನಮಧುನಾ ನಿಷ್ಕ್ರಿಯತಾಽಲಸ್ಯ ಗ್ರಸ್ತಮ್ |
ರಜೋಮಯಮಿದಂ ಕಿಂವಾ ಬಹುಧಾ ಕ್ರೋಧ ಲೋಭಮೋಹಾಭಿಹತಮ್ |
ಭಕ್ತಿಜ್ಞಾನಕರ್ಮವಿಜ್ಞಾನೈಃ ಭವತು ಸಾತ್ತ್ವಿಕೋದ್ಯೋತಮಯಮ್ ||೧||

ವಹ್ನಿವಾಯುಜಲ ಬಲ ವಿವರ್ಧಕಂ ಪಾಂಚಭೌತಿಕಂ ವಿಜ್ಞಾನಮ್ |
ಸಲಿಲನಿಧಿತಲಂ ಗಗನಮಂಡಲಂ ಕರತಲಫಲಮಿವ ಕುರ್ವಾಣಮ್ |
ದೀಕ್ಷುವಿಕೀರ್ಣಂ ಮನುಜಕುಲಮಿದಂ ಘಟಯತುಚೈಕ ಕುಟುಂಬಮಯಮ್ ||೨||

ಸಗುಣಾಕಾರಂ ಹ್ಯಗುಣಾಕಾರಂ ಏಕಾಕಾರಮನೇಕಾಕಾರಮ್ |
ಭಜಂತಿ ಏತೇ ಭಜಂತು ದೇವಮ್ ಸ್ವಸ್ವನಿಷ್ಠಯಾ ವಿಮತ್ಸರಮ್ |
ವಿಶ್ವಧರ್ಮಮಿಮಮುದಾರಭಾವಂ ಪ್ರವರ್ಧಯತು ಸೌಹಾರ್ದಮಯಮ್ ||೩||

ಜೀವೇ ಜೀವೇ ಶಿವಸ್ವರೂಪಂ ಸದಾ ಭಾವಯತು ಸೇವಾಯಾಮ್ |
ಶ್ರೀಮದೂರ್ಜಿತಂ ಮಹಾಮಾನವಂ ಸಮರ್ಚಯತು ನಿಜಪೂಜಾಯಾಮ್ |
ಚರತು ಮಾನವೋಽಯಂ ಸುಹಿತಕರಂ ಧರ್ಮಂ ಸೇವಾತ್ಯಾಗಮಯಂ ||೪||