ತೈತ್ತಿರೀಯೋಪನಿಷತ್

ಓಂ ಶಂ ನೋ॑ ಮಿ॒ತ್ರಃ ಶಂ ವರು॑ಣಃ | ಶಂ ನೋ॑ ಭವತ್ವರ್ಯ॒ಮಾ | ಶಂ ನ॒ ಇಂದ್ರೋ॒ ಬೃಹ॒ಸ್ಪತಿಃ॑ | ಶಂ ನೋ॒ ವಿಷ್ಣು॑ರುರುಕ್ರ॒ಮಃ | ನಮೋ॒ ಬ್ರಹ್ಮ॑ಣೇ | ನಮ॑ಸ್ತೇ ವಾಯೋ | ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ | ತ್ವಾಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮ॑ ವದಿಷ್ಯಾಮಿ | ಋ॒ತಂ ವ॑ದಿಷ್ಯಾಮಿ | ಸ॒ತ್ಯಂ ವ॑ದಿಷ್ಯಾಮಿ | ತನ್ಮಾಮ॑ವತು | ತದ್ವ॒ಕ್ತಾರ॑ಮವತು | ಅವ॑ತು॒ ಮಾಂ | ಅವ॑ತು ವ॒ಕ್ತಾರಂ᳚ | ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ |

ಓಂ ಶೀಕ್ಷಾಂ ವ್ಯಾ᳚ಖ್ಯಾಸ್ಯಾ॒ಮಃ | ವರ್ಣಃ॒ ಸ್ವರಃ | ಮಾತ್ರಾ॒ ಬಲಂ | ಸಾಮ॑ ಸಂತಾ॒ನಃ | ಇತ್ಯುಕ್ತಃ ಶೀ᳚ಕ್ಷಾಧ್ಯಾ॒ಯಃ ||

ಸ॒ಹ ನೌ॒ ಯಶಃ | ಸ॒ಹ ನೌ ಬ್ರ॑ಹ್ಮವ॒ರ್ಚಸಂ | ಅಥಾತಃ ಸꣳಹಿತಾಯಾ ಉಪನಿಷದಂ ವ್ಯಾ᳚ಖ್ಯಾಸ್ಯಾ॒ಮಃ | ಪಂಚಸ್ವಧಿಕ॑ರಣೇ॒ಷು | ಅಧಿಲೋಕಮಧಿಜ್ಯೌತಿಷಮಧಿವಿದ್ಯಮಧಿಪ್ರಜ॑ಮಧ್ಯಾ॒ತ್ಮಂ | ತಾ ಮಹಾಸꣳಹಿತಾ ಇತ್॑ಯಾಚ॒ಕ್ಷತೇ | ಅಥಾ॑ಧಿಲೋ॒ಕಂ | ಪೃಥಿವೀ ಪೂ᳚ರ್ವರೂ॒ಪಂ | ದ್ಯೌರುತ್ತ॑ರರೂ॒ಪಂ | ಆಕಾ॑ಶಃ ಸಂ॒ಧಿಃ | ವಾಯುಃ॑ ಸಂಧಾ॒ನಂ | ಇತ್ಯ॑ಧಿಲೋ॒ಕಂ | ಅಥಾ॑ಧಿಜೌ॒ತಿಷಂ | ಅಗ್ನಿಃ ಪೂ᳚ರ್ವರೂ॒ಪಂ | ಆದಿತ್ಯ ಉತ್ತ॑ರರೂ॒ಪಂ | ಆ॑ಪಃ ಸಂ॒ಧಿಃ | ವೈದ್ಯುತಃ॑ ಸಂಧಾ॒ನಂ | ಇತ್ಯ॑ಧಿಜ್ಯೌ॒ತಿಷಂ | ಅಥಾ॑ಧಿವಿ॒ದ್ಯಂ | ಆಚಾರ್ಯಃ ಪೂ᳚ರ್ವರೂ॒ಪಂ | ಅಂತೇವಾಸ್ಯುತ್ತ॑ರರೂ॒ಪಂ | ವಿ॑ದ್ಯಾ ಸಂ॒ಧಿಃ | ಪ್ರವಚನ॑ꣳಸಂಧಾ॒ನಂ | ಇತ್ಯ॑ಧಿವಿ॒ದ್ಯಂ | ಅಥಾಧಿ॒ಪ್ರಜಂ | ಮಾತಾ ಪೂ᳚ರ್ವರೂ॒ಪಂ | ಪಿತೋತ್ತ॑ರರೂ॒ಪಂ | ಪ್ರ॑ಜಾ ಸಂ॒ಧಿಃ | ಪ್ರಜನನꣳಸಂಧಾ॒ನಂ | ಇತ್ಯಧಿ॒ಪ್ರಜಂ | ಅಥಾಧ್ಯಾ॒ತ್ಮಂ | ಅಧರಾಹನುಃ ಪೂ᳚ರ್ವರೂ॒ಪಂ | ಉತ್ತರಾಹನೂತ್ತ॑ರರೂ॒ಪಂ | ವಾಕ್ಸಂ॒ಧಿಃ | ಜಿಹ್ವಾ॑ಸಂಧಾ॒ನಂ | ಇತ್ಯಧ್ಯಾ॒ತ್ಮಂ | ಇತೀಮಾಮ॒ಹಾಸ॒ꣳಹಿತಾಃ | ಯ ಏವಮೇತಾ ಮಹಾಸꣳಹಿತಾ ವ್ಯಾಖ್ಯಾ॑ತಾ ವೇ॒ದ | ಸಂಧೀಯತೇ ಪ್ರಜ॑ಯಾ ಪ॒ಶುಭಿಃ | ಬ್ರಹ್ಮವರ್ಚಸೇನಾನ್ನಾದ್ಯೇನ ಸುವರ್ಗ್ಯೇಣ॑ ಲೋಕೇ॒ನ ||

ಯಶ್ಛಂದ॑ಸಾಮೃಷ॒ಭೋ ವಿ॒ಶ್ವರೂ॑ಪಃ | ಛಂದೋ॒ಭ್ಯೋಽಧ್ಯ॒ಮೃತಾ᳚ತ್ಸಂಬ॒ಭೂವ॑ | ಸ ಮೇಂದ್ರೋ॑ ಮೇ॒ಧಯಾ᳚ ಸ್ಪೃಣೋತು | ಅ॒ಮೃತ॑ಸ್ಯ ದೇವ॒ ಧಾರ॑ಣೋ ಭೂಯಾಸಂ | ಶರೀ॑ರಂ ಮೇ॒ ವಿಚ॑ರ್ಷಣಂ | ಜಿಹ್॒ವಾ ಮೇ॒ ಮಧು॑ಮತ್ತಮಾ | ಕರ್ಣಾ᳚ಭ್ಯಾಂ॒ ಭೂರಿ॒ವಿಶ್ರು॑ವಂ | ಬ್ರಹ್ಮ॑ಣಃ ಕೋ॒ಶೋ॑ಽಸಿ ಮೇ॒ಧಯಾ ಪಿ॑ಹಿತಃ | ಶ್ರು॒ತಂ ಮೇ॑ ಗೋಪಾಯ | ಆ॒ವಹಂ॑ತೀ ವಿತನ್ವಾ॒ನಾ | ಕು॒ರ್ವಾ॒ಣಾಽಚೀರ॑ಮಾ॒ತ್ಮನಃ॑ | ವಾಸಾ॑ꣳಸಿ॒ ಮಮ॒ ಗಾವ॑ಶ್ಚ | ಅ॒ನ್ನ॒ಪಾ॒ನೇ ಚ॑ ಸರ್ವ॒ದಾ | ತತೋ॑ ಮೇ॒ ಶ್ರಿಯ॒ಮಾವ॑ಹ | ಲೋ॒ಮ॒ಶಾಂ ಪ॒ಶುಭಿಃ॑ ಸ॒ಹ ಸ್ವಾಹಾ᳚ | ಆಮಾ॑ಯಂತು ಬ್ರಹ್ಮಚಾ॒ರಿಣಃ॒ ಸ್ವಾಹಾ᳚ | ವಿಮಾ॑ಽಽಯಂತು ಬ್ರಹ್ಮಚಾ॒ರಿಣಃ॒ ಸ್ವಾಹಾ᳚ | ಪ್ರಮಾ॑ಽಽಯಂತು ಬ್ರಹ್ಮಚಾ॒ರಿಣಃ॒ ಸ್ವಾಹಾ᳚ | ದಮಾ॑ಯಂತು ಬ್ರಹ್ಮಚಾ॒ರಿಣಃ॒ ಸ್ವಾಹಾ᳚ | ಶಮಾ॑ಯಂತು ಬ್ರಹ್ಮಚಾ॒ರಿಣಃ॒ ಸ್ವಾಹಾ᳚ | ಯಶೋ॒ ಜನೇ॑ಽಸಾನಿ॒ ಸ್ವಾಹಾ᳚ | ಶ್ರೇಯಾ॒ನ್॒ ವಸ್ಯ॑ಸೋಽಸಾನಿ॒ ಸ್ವಾಹಾ᳚ | ತಂ ತ್ವಾ॑ ಭಗ॒ ಪ್ರವಿ॑ಶಾನಿ॒ ಸ್ವಾಹಾ᳚ | ಸ ಮಾ॑ ಭಗ॒ ಪ್ರವಿ॑ಶ॒ ಸ್ವಾಹಾ᳚ | ತಸ್ಮಿನ್᳚ ಸ॒ಹಸ್ರ॑ಶಾಖೇ | ನಿಭ॑ಗಾ॒ಽಹಂ ತ್ವಯಿ॑ ಮೃಜೇ॒ ಸ್ವಾಹಾ᳚ | ಯಥಾಽಽಪಃ॒ ಪ್ರವ॑ತಾ॒ಽಽಯಂತಿ॑ | ಯಥಾ॒ ಮಾಸಾ॑ ಅಹರ್ಜ॒ರಂ | ಏ॒ವಂ ಮಾಂ ಬ್ರ॑ಹ್ಮಚಾ॒ರಿಣಃ॑ | ಧಾತ॒ರಾಯಂ॑ತು ಸ॒ರ್ವತಃ॒ ಸ್ವಾಹಾ᳚ | ಪ್ರ॒ತಿ॒ವೇ॒ಶೋ॑ಽಸಿ॒ ಪ್ರಮಾ॑ಭಾಹಿ॒ ಪ್ರಮಾ॑ಪದ್ಯಸ್ವ ||

ಭೂರ್ಭುವಃ॒ ಸುವ॒ರಿತಿ॒ ವಾ ಏ॒ತಾಸ್ತಿ॒ಸ್ರೋ ವ್ಯಾಹೃ॑ತಯಃ | ತಾಸಾ॑ಮುಹಸ್ಮೈ॒ ತಾಂ ಚ॑ತು॒ರ್ಥೀಂ | ಮಾಹಾ॑ಚಮಸ್ಯಃ॒ ಪ್ರವೇ॑ದಯತೇ | ಮಹ॒ ಇತಿ॑ | ತದ್ಬ್ರಹ್ಮ॑ | ಸ ಆ॒ತ್ಮಾ | ಅಂಗಾ᳚ನ್ಯ॒ನ್ಯಾ ದೇ॒ವತಾಃ᳚ | ಭೂರಿತಿ॒ ವಾ ಅ॒ಯಂ ಲೋ॒ಕಃ | ಭುವ॒ ಇತ್ಯಂ॒ತರಿ॑ಕ್ಷಂ | ಸುವ॒ರಿತ್ಯ॒ಸೌ ಲೋ॒ಕಃ | ಮಹ॒ ಇತ್ಯಾ॑ದಿ॒ತ್ಯಃ | ಆ॒ದಿ॒ತ್ಯೇನ॒ ವಾವ ಸರ್ವೇ॑ಲೋ॒ಕ ಮಹೀ॑ಯಂತೇ | ಭೂರಿತಿ॒ ವಾ ಅ॒ಗ್ನಿಃ | ಭುವ॒ ಇತಿ॑ ವಾ॒ಯುಃ | ಸುವ॒ರಿತ್ಯಾ॑ದಿ॒ತ್ಯಃ | ಮಹ॒ ಇತಿ॑ ಚಂ॒ದ್ರಮಾಃ᳚ | ಚಂ॒ದ್ರಮ॑ಸಾ॒ ವಾವ ಸರ್ವಾ॑ಣಿ॒ ಜ್ಯೋತೀꣳಷಿ॒ ಮಹೀ॑ಯಂತೇ | ಭೂರಿತಿ॒ ವಾ ಋಚಃ॑ | ಭುವ॒ ಇತಿ॒ ಸಾಮಾ॑ನಿ | ಸುವ॒ರಿತಿ॒ ಯಜೂ॑ꣳಷಿ | ಮಹ॒ ಇತಿ॒ ಬ್ರಹ್ಮ॑ | ಬ್ರಹ್ಮ॑ಣಾ॒ ವಾವ ಸರ್ವೇ॑ವೇ॒ದಾ ಮಹೀ॑ಯಂತೇ | ಭೂರಿತಿ॒ ವೈ ಪ್ರಾ॒ಣಃ | ಭುವ॒ ಇತ್ಯ॑ಪಾ॒ನಃ | ಸುವ॒ರಿತಿ॑ ವ್ಯಾ॒ನಃ | ಮಹ॒ ಇತ್ಯನ್ನಂ᳚ | ಅನ್ನೇ॑ನ॒ ವಾವ ಸರ್ವೇ᳚ ಪ್ರಾ॒ಣ ಮಹೀ॑ಯಂತೇ | ತಾ ವಾ ಏ॒ತಾಶ್ಚತ॑ಸ್ರಶ್ಚತು॒ರ್ಧಾ | ಚತ॑ಸ್ರಶ್ಚತಸ್ರೋ॒ ವ್ಯಾಹೃ॑ತಯಃ | ತಾ ಯೋ ವೇದ॑ | ಸ ವೇ॑ದ॒ ಬ್ರಹ್ಮ॑ | ಸರ್ವೇ᳚ಽಸ್ಮೈದೇ॒ವಾ ಬ॒ಲಿಮಾವ॑ಹಂತಿ ||

ಸ ಯ ಏ॒ಷೋ᳚ಽನ್ತ॑ಹೃದಯ ಆಕಾ॒ಶಃ | ತಸ್ಮಿ॑ನ್ನ॒ಯಂ ಪುರು॑ಷೋ ಮನೋ॒ಮಯಃ॑ | ಅಮೃ॑ತೋ ಹಿರ॒ಣ್ಮಯಃ॑ | ಅಂತ॑ರೇಣ॒ ತಾಲು॑ಕೇ | ಯ ಏ॒ಷಸ್ತನ॑ ಇವಾವ॒ಲಂಬ॑ತೇ | ಸೇಂ᳚ದ್ರಯೋ॒ನಿಃ | ಯತ್ರಾ॒ಸೌ ಕೇ॑ಶಾಂ॒ತೋ ವಿ॒ವರ್ತ॑ತೇ | ವ್ಯ॒ಪೋಹ್ಯ॑ ಶೀರ್ಷಕಪಾ॒ಲೇ | ಭೂರಿತ್ಯ॒ಗ್ನೌ ಪ್ರತಿ॑ತಿಷ್ಠತಿ | ಭುವ॒ ಇತಿ॑ ವಾ॒ಯೌ | ಸುವ॒ರಿತ್ಯಾ॑ದಿ॒ತ್ಯೇ | ಮಹ॒ ಇತಿ॒ ಬ್ರಹ್ಮ॑ಣಿ | ಆ॒ಪ್ನೋತಿ॒ ಸ್ವಾರಾ᳚ಜ್ಯಂ | ಆ॒ಪ್ನೋತಿ॒ ಮನ॑ಸ॒ಸ್ಪತಿಂ᳚ | ವಾಕ್ಪ॑ತಿ॒ಶ್ಚಕ್ಷು॑ಷ್ಪತಿಃ | ಶ್ರೋತ್ರ॑ಪತಿರ್ವಿ॒ಜ್ಞಾನ॑ಪತಿಃ | ಏ॒ತತ್ತತೋ॑ ಭವತಿ | ಆ॒ಕಾ॒ಶಶ॑ರೀರಂ॒ ಬ್ರಹ್ಮ॑ | ಸ॒ತ್ಯಾತ್ಮ॑ ಪ್ರಾ॒ಣಾರಾ॑ಮಂ॒ ಮನ॑ ಆನಂದಂ | ಶಾಂತಿ॑ಸಮೃದ್ಧಮ॒ಮೃತಂ᳚ | ಇತಿ॑ ಪ್ರಾಚೀನ ಯೋ॒ಗ್ಯೋಪಾ᳚ಸ್ವ ||

ಪೃ॒ಥಿ॒ವ್ಯಂ॑ತರಿ॑ಕ್ಷಂ॒ ದ್ಯೌರ್ದಿಶೋ॑ಽವಾಂತರದಿ॒ಶಾಃ | ಅ॒ಗ್ನಿರ್ವಾ॒ಯುರಾ॑ದಿ॒ತ್ಯಶ್ಚಂ॒ದ್ರಮಾ॒ ನಕ್ಷ॑ತ್ರಾಣಿ | ಆಪ॒ ಓಷ॑ಧಯೋ॒ ವನ॒ಸ್ಪತ॑ಯ ಆಕಾ॒ಶ ಆ॒ತ್ಮಾ | ಇತ್ಯ॑ಧಿಭೂ॒ತಂ | ಅಥಾಧ್ಯಾ॒ತ್ಮಂ | ಪ್ರಾ॒ಣೋ ವ್ಯಾ॒ನೋ॑ಽಪಾ॒ನ ಉ॑ದಾ॒ನಃ ಸ॑ಮಾ॒ನಃ | ಚಕ್ಷುಃ॒ ಶ್ರೋತ್ರಂ॒ ಮನೋ॒ ವಾಕ್ ತ್ವಕ್ | ಚರ್ಮ॑ಮಾ॒ꣳಸ ಸ್ನಾವಾಸ್ಥಿ॑ ಮ॒ಜ್ಜಾ | ಏ॒ತದ॑ಧಿವಿ॒ಧಾಯ॒ ಋಷಿ॒ರವೋ॑ಚತ್ | ಪಾಂಕ್ತಂ॒ ವಾ ಇ॒ದꣳಸರ್ವಂ᳚ | ಪಾಂಕ್ತೇ॑ನೈ॒ವ ಪಾಂಕ್ತಗ್॑ ಸ್ಪೃಣೋ॒ತೀತಿ॑ ||

ಓಮಿತಿ॒ ಬ್ರಹ್ಮ॑ | ಓಮಿತೀ॒ದꣳಸರ್ವಂ᳚ | ಓಮಿತ್ಯೇ॒ತದ॑ನುಕೃತಿರ್ಹಸ್ಮ॒ ವಾ ಅ॒ಪ್ಯೋಶ್ರಾ॑ವ॒ಯೇತ್ಯಾಶ್ರಾ॑ವಯಂತಿ | ಓಮಿತಿ॒ ಸಾಮಾ॑ನಿ ಗಾಯಂತಿ | ಓಂꣳಶೋಮಿತಿ॑ ಶ॒ಸ್ತ್ರಾಣಿ॑ ಶꣳಸಂತಿ | ಓಮಿತ್ಯ॑ಧ್ವ॒ರ್ಯುಃ ಪ್ರ॑ತಿಗ॒ರಂ ಪ್ರತಿ॑ಗೃಣಾತಿ | ಓಮಿತಿ॒ ಬ್ರಹ್ಮಾ॒ ಪ್ರಸೌ॑ತಿ | ಓಮಿತ್ಯ॑ಗ್ನಿಹೋ॒ತ್ರಮನು॑ಜಾನಾತಿ | ಓಮಿತಿ॒ ಬ್ರಾಹ್ಮ॒ಣಃ ಪ್ರ॑ವ॒ಕ್ಷ್ಯನ್ನಾ॑ಹ॒ ಬ್ರಹ್ಮೋಪಾ᳚ಪ್ನವಾ॒ನೀತಿ॑ | ಬ್ರಹ್ಮೈ॒ವೋಪಾ᳚ಪ್ನೋತಿ ||

ಋತಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಸತ್ಯಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ತಪಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ದಮಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಶಮಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಅಗ್ನಯಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಅಗ್ನಿಹೋತ್ರಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಅತಿಥಯಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಮಾನುಷಂ ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಪ್ರಜಾ ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಪ್ರಜನಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಪ್ರಜಾತಿಶ್ಚ ಸ್ವಾಧ್ಯಾಯಪ್ರವ॑ಚನೇ॒ ಚ | ಸತ್ಯಮಿತಿ ಸತ್ಯವಚಾ॑ ರಾಥೀ॒ ತರಃ | ತಪ ಇತಿ ತಪೋನಿತ್ಯಃ ಪೌ॑ರುಶಿ॒ಷ್ಟಿಃ | ಸ್ವಾಧ್ಯಾಯಪ್ರವಚನೇ ಏವೇತಿ ನಾಕೋ॑ ಮೌದ್ಗ॒ಲ್ಯಃ | ತದ್ಧಿ ತಪ॑ಸ್ತದ್ಧಿ॒ ತಪಃ ||

ಅ॒ಹಂ ವೃ॒ಕ್ಷಸ್ಯ॒ ರೇರಿ॑ವಾ | ಕೀ॒ರ್ತಿಃ ಪೃ॒ಷ್ಠಂ ಗಿ॒ರೇರಿ॑ವ |
ಊ॒ರ್ಧ್ವಪ॑ವಿತ್ರೋ ವಾ॒ಜಿನೀ॑ವ ಸ್ವ॒ಮೃತ॑ಮಸ್ಮಿ |
ದ್ರವಿ॑ಣꣳಸವರ್ಚಸಂ | ಸುಮೇಧ ಅ॑ಮೃತೋ॒ಕ್ಷಿತಃ |
ಇತಿ ತ್ರಿಶಂಕೋರ್ವೇದಾ॑ನುವ॒ಚನಂ ||

ವೇದಮನೂಚ್ಯಾಚಾರ್ಯೋಂತೇವಾಸಿನಮ॑ನುಶಾ॒ಸ್ತಿ | ಸತ್ಯಂ॒ ವದ | ಧರ್ಮಂ॒ ಚರ | ಸ್ವಾಧ್ಯಾಯಾ᳚ನ್ಮಾ ಪ್ರ॒ಮದಃ | ಆಚಾರ್ಯಾಯ ಪ್ರಿಯಂ ಧನಮಾಹೃತ್ಯ ಪ್ರಜಾತಂತುಂ ಮಾ ವ್ಯ॑ವಚ್ಛೇ॒ತ್ಸೀಃ | ಸತ್ಯಾನ್ನ ಪ್ರಮ॑ದಿತ॒ವ್ಯಂ | ಧರ್ಮಾನ್ನ ಪ್ರಮ॑ದಿತ॒ವ್ಯಂ | ಕುಶಲಾನ್ನ ಪ್ರಮ॑ದಿತ॒ವ್ಯಂ | ಭೂತ್ಯೈ ನ ಪ್ರಮ॑ದಿತ॒ವ್ಯಂ | ಸ್ವಾಧ್ಯಾಯಪ್ರವಚನಾಭ್ಯಾಂ ನ ಪ್ರಮ॑ದಿತ॒ವ್ಯಂ | ದೇವಪಿತೃಕಾರ್ಯಾಭ್ಯಾಂ ನ ಪ್ರಮ॑ದಿತ॒ವ್ಯಂ | ಮಾತೃ॑ದೇವೋ॒ ಭವ | ಪಿತೃ॑ದೇವೋ॒ ಭವ | ಆಚಾರ್ಯ॑ದೇವೋ॒ ಭವ | ಅತಿಥಿ॑ದೇವೋ॒ ಭವ | ಯಾನ್ಯನವದ್ಯಾನಿ॑ ಕರ್ಮಾ॒ಣಿ | ತಾನಿ ಸೇವಿ॑ತವ್ಯಾ॒ನಿ | ನೋ ಇ॑ತರಾ॒ಣಿ | ಯಾನ್ಯಸ್ಮಾಕꣳಸುಚ॑ರಿತಾ॒ನಿ | ತಾನಿ ತ್ವಯೋ॑ಪಾಸ್ಯಾ॒ನಿ | ನೋ ಇ॑ತರಾ॒ಣಿ | ಯೇ ಕೇ ಚಾಸ್ಮಚ್ಛ್ರೇಯಾ॑ꣳಸೋ ಬ್ರಾ॒ಹ್ಮಣಾಃ | ತೇಷಾಂ ತ್ವಯಾಽಽಸನೇನ ಪ್ರಶ್ವ॑ಸಿತ॒ವ್ಯಂ | ಶ್ರದ್ಧ॑ಯಾ ದೇ॒ಯಂ | ಅಶ್ರದ್ಧ॑ಯಾಽದೇ॒ಯಂ | ಶ್ರಿ॑ಯಾ ದೇ॒ಯಂ | ಹ್ರಿ॑ಯಾ ದೇ॒ಯಂ | ಭಿ॑ಯಾ ದೇ॒ಯಂ | ಸಂವಿ॑ದಾ ದೇ॒ಯಂ | ಅಥ ಯದಿ ತೇ ಕರ್ಮವಿಚಿಕಿತ್ಸಾ ವಾ ವೃತ್ತವಿಚಿಕಿ॑ತ್ಸಾ ವಾ॒ ಸ್ಯಾತ್ | ಯೇ ತತ್ರ ಬ್ರಾಹ್ಮಣಾಃ᳚ ಸಂಮ॒ರ್ಶಿನಃ | ಯುಕ್ತಾ॑ ಆಯು॒ಕ್ತಾಃ | ಅಲೂಕ್ಷಾ॑ ಧರ್ಮ॑ಕಾಮಾಃ॒ ಸ್ಯುಃ | ಯಥಾ ತೇ॑ ತತ್ರ॑ ವರ್ತೇ॒ರನ್ | ತಥಾ ತತ್ರ॑ ವರ್ತೇ॒ಥಾಃ | ಅಥಾಭ್ಯಾ᳚ಖ್ಯಾ॒ತೇಷು | ಯೇ ತತ್ರ ಬ್ರಾಹ್ಮಣಾಃ᳚ ಸಂಮ॒ರ್ಶಿನಃ | ಯುಕ್ತಾ॑ ಆಯು॒ಕ್ತಾಃ | ಅಲೂಕ್ಷಾ॑ ಧರ್ಮ॑ಕಾಮಾಃ॒ ಸ್ಯುಃ | ಯಥಾ ತೇ॑ ತೇಷು॑ ವರ್ತೇ॒ರನ್ | ತಥಾ ತೇಷು॑ ವರ್ತೇ॒ಥಾಃ | ಏಷ॑ ಆದೇ॒ಶಃ | ಏಷ ಉ॑ಪದೇ॒ಶಃ | ಏಷಾ ವೇ॑ದೋಪ॒ನಿಷತ್ | ಏತದ॑ನುಶಾ॒ಸನಂ | ಏವಮುಪಾ॑ಸಿತ॒ವ್ಯಂ | ಏವಮು ಚೈತ॑ದುಪಾ॒ಸ್ಯಂ ||

ಶಂ ನೋ॑ ಮಿ॒ತ್ರಃ ಶಂ ವರು॑ಣಃ | ಶಂ ನೋ॑ ಭವತ್ವರ್ಯ॒ಮಾ | ಶಂ ನ॒ ಇಂದ್ರೋ॒ ಬೃಹ॒ಸ್ಪತಿಃ॑ | ಶಂ ನೋ॒ ವಿಷ್ಣು॑ರುರುಕ್ರ॒ಮಃ | ನಮೋ॒ ಬ್ರಹ್ಮ॑ಣೇ | ನಮ॑ಸ್ತೇ ವಾಯೋ | ತ್ವಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾ॑ಸಿ | ತ್ವಾಮೇ॒ವ ಪ್ರ॒ತ್ಯಕ್ಷಂ॒ ಬ್ರಹ್ಮಾವಾ॑ದಿಷಂ | ಋ॒ತಮ॑ವಾದಿಷಂ | ಸ॒ತ್ಯಮ॑ವಾದಿಷಂ | ತನ್ಮಾಮಾ॑ವೀತ್ | ತದ್ವ॒ಕ್ತಾರ॑ಮಾವೀತ್ | ಆವೀ॒ನ್ಮಾಂ | ಆವೀ᳚ದ್ವ॒ಕ್ತಾರಂ᳚ | ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||

<b>ಬ್ರಹ್ಮಾನಂದವಲ್ಲೀ</b>

ಓಂ ಸ॒ಹ ನಾ॑ವವತು | ಸ॒ಹ ನೌ॑ ಭುನಕ್ತು | ಸ॒ಹ ವೀ॒ರ್ಯಂ॑ ಕರವಾವಹೈ | ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ | ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||

ಓಂ ಬ್ರ॒ಹ್ಮ॒ವಿದಾ॑ಪ್ನೋತಿ॒ ಪರಂ᳚ | ತದೇ॒ಷಾಽಭ್ಯು॑ಕ್ತಾ | ಸ॒ತ್ಯಂ ಜ್ಞಾ॒ನಮ॑ನಂ॒ತಂ ಬ್ರಹ್ಮ॑ | ಯೋ ವೇ॑ದ॒ ನಿಹಿ॑ತಂ॒ ಗುಹಾ॑ಯಾಂ ಪರ॒ಮೇ ವ್ಯೋ॑ಮನ್ | ಸೋ᳚ಽಶ್ನುತೇ॒ ಸರ್ವಾ॒ನ್ ಕಾಮಾ᳚ನ್ಸ॒ಹ | ಬ್ರಹ್ಮ॑ಣಾ ವಿಪ॒ಶ್ಚಿತೇತಿ॑ | ತಸ್ಮಾ॒ದ್ವಾ ಏ॒ತಸ್ಮಾ॑ದಾ॒ತ್ಮನ॑ ಆಕಾ॒ಶಃ ಸಂಭೂ॑ತಃ | ಆ॒ಕಾ॒ಶಾದ್ವಾ॒ಯುಃ | ವಾಯ್॒ಓರ॒ಗ್ನಿಃ | ಅ॒ಗ್ನೇರಾಪಃ॑ | ಅ॒ದ್ಭ್ಯಃ ಪೃ॑ಥಿ॒ವೀ | ಪೃ॒ಥಿ॒ವ್ಯಾ ಓಷ॑ಧಯಃ | ಓಷ॑ಧೀ॒ಭ್ಯೋನ್ನಂ᳚ | ಅನ್ನಾ॒ತ್ಪುರು॑ಷಃ | ಸ ವಾ ಏಷ ಪುರುಷೋಽನ್ನ॑ರಸ॒ಮಯಃ | ತಸ್ಯೇದ॑ಮೇವ॒ ಶಿರಃ | ಅಯಂ ದಕ್ಷಿ॑ಣಃ ಪ॒ಕ್ಷಃ | ಅಯಮುತ್ತ॑ರಃ ಪ॒ಕ್ಷಃ | ಅಯಮಾತ್ಮಾ᳚ | ಇದಂ ಪುಚ್ಛಂ॑ ಪ್ರತಿ॒ಷ್ಠಾ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಅನ್ನಾ॒ದ್ವೈ ಪ್ರ॒ಜಾಃ ಪ್ರ॒ಜಾಯಂ॑ತೇ | ಯಾಃ ಕಾಶ್ಚ॑ ಪೃಥಿ॒ವೀꣳಶ್ರಿತಾಃ | ಅಥೋ॒ ಅನ್ನೇ॑ನೈ॒ವ ಜೀ॑ವಂತಿ | ಅಥೈ॑ನ॒ದಪಿ॑ ಯಂತ್ಯಂತ॒ತಃ | ಅನ್ನ॒ꣳಹಿ ಭೂ॒ತಾನಾಂ॒ ಜ್ಯೇಷ್ಠಂ᳚ | ತಸ್ಮಾ᳚ತ್ ಸರ್ವೌಷ॒ಧಮು॑ಚ್ಯತೇ | ಸರ್ವಂ॒ ವೈ ತೇಽನ್ನ॑ಮಾಪ್ನುವಂತಿ | ಯೇಽನ್ನಂ॒ ಬ್ರಹ್ಮೋ॒ಪಾಸ॑ತೇ | ಅನ್ನ॒ꣳಹಿ ಭೂ॒ತಾನಾಂ॒ ಜ್ಯೇಷ್ಠಂ᳚ | ತಸ್ಮಾ᳚ತ್ ಸರ್ವೌಷ॒ಧಮು॑ಚ್ಯತೇ | ಅನ್ನಾದ್᳚ ಭೂ॒ತಾನಿ॒ ಜಾಯಂ॑ತೇ | ಜಾತಾ॒ನ್ಯನ್ನೇ॑ನ ವರ್ಧಂತೇ | ಅದ್ಯತೇಽತ್ತಿ ಚ॑ ಭೂತಾ॒ನಿ | ತಸ್ಮಾದನ್ನಂ ತದುಚ್ಯ॑ತ ಇ॒ತಿ | ತಸ್ಮಾದ್ವಾ ಏತಸ್ಮಾದನ್ನ॑ರಸ॒ಮಯಾತ್ | ಅನ್ಯೋಽನ್ತರ ಆತ್ಮಾ᳚ ಪ್ರಾಣ॒ಮಯಃ | ತೇನೈ॑ಷ ಪೂ॒ರ್ಣಃ | ಸ ವಾ ಏಷ ಪುರುಷವಿ॑ಧ ಏ॒ವ | ತಸ್ಯ ಪುರು॑ಷವಿ॒ಧತಾಂ | ಅನ್ವಯಂ॑ ಪುರುಷ॒ವಿಧಃ | ತಸ್ಯ ಪ್ರಾಣ॑ ಏವ॒ ಶಿರಃ | ವ್ಯಾನೋ ದಕ್ಷಿ॑ಣಃ ಪ॒ಕ್ಷಃ | ಅಪಾನ ಉತ್ತ॑ರಃ ಪ॒ಕ್ಷಃ | ಆಕಾ॑ಶ ಆ॒ತ್ಮಾ | ಪೃಥಿವೀ ಪುಚ್ಛಂ॑ ಪ್ರತಿ॒ಷ್ಠಾ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಪ್ರಾ॒ಣಂ ದೇ॒ವಾ ಅನು॒ ಪ್ರಾಣಂ॑ತಿ | ಮ॒ನು॒ಷ್ಯಾಃ᳚ ಪ॒ಶವ॑ಶ್ಚ॒ ಯೇ | ಪ್ರಾ॒ಣೋ ಹಿ ಭೂ॒ತಾನಾಂ॒ಆಯುಃ॑ | ತಸ್ಮಾತ್᳚ ಸರ್ವಾಯು॒ಷಮು॑ಚ್ಯತೇ | ಸರ್ವ॑ಮೇ॒ವ ತ ಆಯು॑ರ್ಯಂತಿ | ಯೇ ಪ್ರಾ॒ಣಂ ಬ್ರಹ್ಮೋ॒ಪಾಸ॑ತೇ | ಪ್ರಾಣೋ ಹಿ ಭೂತಾ॑ನಾಮಾ॒ಯುಃ | ತಸ್ಮಾತ್ ಸರ್ವಾಯುಷಮುಚ್ಯ॑ತ ಇ॒ತಿ | ತಸ್ಯೈಷ ಏವ ಶಾರೀ॑ರ ಆ॒ತ್ಮಾ | ಯಃ॑ ಪೂರ್ವ॒ಸ್ಯ | ತಸ್ಮಾದ್ವಾ ಏತಸ್ಮಾ᳚ತ್ ಪ್ರಾಣ॒ಮಯಾತ್ | ಅನ್ಯೋಽನ್ತರ ಆತ್ಮಾ॑ ಮನೋ॒ಮಯಃ | ತೇನೈ॑ಷ ಪೂ॒ರ್ಣಃ | ಸ ವಾ ಏಷ ಪುರುಷವಿ॑ಧ ಏ॒ವ | ತಸ್ಯ ಪುರು॑ಷವಿ॒ಧತಾಂ | ಅನ್ವಯಂ॑ ಪುರುಷ॒ವಿಧಃ | ತಸ್ಯ ಯಜು॑ರೇವ॒ ಶಿರಃ | ಋಗ್ದಕ್ಷಿ॑ಣಃ ಪ॒ಕ್ಷಃ | ಸಾಮೋತ್ತ॑ರಃ ಪ॒ಕ್ಷಃ | ಆದೇ॑ಶ ಆ॒ತ್ಮಾ | ಅಥರ್ವಾಂಗಿರಸಃ ಪುಚ್ಛಂ॑ ಪ್ರತಿ॒ಷ್ಠಾ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಯತೋ॒ ವಾಚೋ॒ ನಿವ॑ರ್ತಂತೇ | ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ | ಆನಂದಂ ಬ್ರಹ್ಮ॑ಣೋ ವಿ॒ದ್ವಾನ್ | ನ ಬಿಭೇತಿ ಕದಾ॑ಚನೇ॒ತಿ | ತಸ್ಯೈಷ ಏವ ಶಾರೀ॑ರ ಆ॒ತ್ಮಾ | ಯಃ॑ ಪೂರ್ವ॒ಸ್ಯ | ತಸ್ಮಾದ್ವಾ ಏತಸ್ಮಾ᳚ನ್ಮನೋ॒ಮಯಾತ್ | ಅನ್ಯೋಽನ್ತರ ಆತ್ಮಾ ವಿ॑ಜ್ಞಾನ॒ಮಯಃ | ತೇನೈ॑ಷ ಪೂ॒ರ್ಣಃ | ಸ ವಾ ಏಷ ಪುರುಷವಿ॑ಧ ಏ॒ವ | ತಸ್ಯ ಪುರು॑ಷವಿ॒ಧತಾಂ | ಅ॒ನ್ವಯಂ॑ ಪುರುಷ॒ವಿಧಃ | ತಸ್ಯ ಶ್ರ॑ದ್ಧೈವ॒ ಶಿರಃ | ಋತಂ ದಕ್ಷಿ॑ಣಃ ಪ॒ಕ್ಷಃ | ಸತ್ಯಮುತ್ತ॑ರಃ ಪ॒ಕ್ಷಃ | ಯೋ॑ಗ ಆ॒ತ್ಮಾ | ಮಹಃ ಪುಚ್ಛಂ॑ ಪ್ರತಿ॒ಷ್ಠಾ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ವಿ॒ಜ್ಞಾನಂ॑ ಯ॒ಜ್ಞಂ ತ॑ನುತೇ | ಕರ್ಮಾ॑ಣಿ ತನು॒ತೇಽಪಿ॑ ಚ | ವಿ॒ಜ್ಞಾನಂ॑ ದೇ॒ವಾಃ ಸರ್ವೇ᳚ | ಬ್ರಹ್ಮ॒ ಜ್ಯೇಷ್ಠ॒ಮುಪಾ॑ಸತೇ | ವಿ॒ಜ್ಞಾನಂ॒ ಬ್ರಹ್ಮ॒ ಚೇದ್ವೇದ॑ | ತಸ್ಮಾ॒ಚ್ಚೇನ್ನ ಪ್ರ॒ಮಾದ್ಯ॑ತಿ | ಶ॒ರೀರೇ॑ ಪಾಪ್ಮ॑ನೋ ಹಿ॒ತ್ವಾ | ಸರ್ವಾನ್ಕಾಮಾನ್ ಸಮಶ್ನು॑ತ ಇ॒ತಿ | ತಸ್ಯೈಷ ಏವ ಶಾರೀ॑ರ ಆ॒ತ್ಮಾ | ಯಃ॑ ಪೂರ್ವ॒ಸ್ಯ | ತಸ್ಮಾದ್ವಾ ಏತಸ್ಮಾದ್ವಿ॑ಜ್ಞಾನ॒ಮಯಾತ್ | ಅನ್ಯೋಽನ್ತರ ಆತ್ಮಾ॑ಽಽನಂದ॒ಮಯಃ | ತೇನೈ॑ಷ ಪೂ॒ರ್ಣಃ | ಸ ವಾ ಏಷ ಪುರುಷವಿ॑ಧ ಏ॒ವ | ತಸ್ಯ ಪುರು॑ಷವಿ॒ಧತಾಂ | ಅನ್ವಯಂ॑ ಪುರುಷ॒ವಿಧಃ | ತಸ್ಯ ಪ್ರಿಯ॑ಮೇವ॒ ಶಿರಃ | ಮೋದೋ ದಕ್ಷಿ॑ಣಃ ಪ॒ಕ್ಷಃ | ಪ್ರಮೋದ ಉತ್ತ॑ರಃ ಪ॒ಕ್ಷಃ | ಆನಂ॑ದ ಆ॒ತ್ಮಾ | ಬ್ರಹ್ಮ ಪುಚ್ಛಂ॑ ಪ್ರತಿ॒ಷ್ಠಾ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಅಸ॑ನ್ನೇ॒ವ ಸ॑ ಭವತಿ | ಅಸ॒ದ್ಬ್ರಹ್ಮೇತಿ॒ ವೇದ॒ ಚೇತ್ | ಅಸ್ತಿ ಬ್ರಹ್ಮೇತಿ॑ ಚೇದ್ವೇ॒ದ | ಸಂತಮೇನಂ ತತೋ ವಿ॑ದುರಿ॒ತಿ | ತಸ್ಯೈಷ ಏವ ಶಾರೀ॑ರ ಆ॒ತ್ಮಾ | ಯಃ॑ ಪೂರ್ವ॒ಸ್ಯ | ಅಥಾತೋ॑ಽನುಪ್ರ॒ಶ್ನಾಃ | ಉ॒ತಾವಿ॒ದ್ವಾನ॒ಮುಂ ಲೋ॒ಕಂ ಪ್ರೇತ್ಯ॑ | ಕಶ್ಚ॒ನ ಗ॑ಚ್ಛ॒ತೀ೩ | ಆಽಽ | ಆಹೋ॑ ವಿ॒ದ್ವಾನ॒ಮುಂ ಲೋ॒ಕಂ ಪ್ರೇತ್ಯ॑ | ಕಶ್ಚಿ॒ತ್ಸಮ॑ಶ್ನು॒ತಾ೩ ಉ॒ | ಸೋ॑ಽಕಾಮಯತ | ಬ॒ಹುಸ್ಯಾಂ॒ ಪ್ರಜಾ॑ಯೇ॒ಯೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ | ಇ॒ದꣳಸರ್ವ॑ಮಸೃಜತ | ಯದಿ॒ದಂ ಕಿಂಚ॑ | ತತ್ಸೃ॒ಷ್ಟ್ವಾ | ತದೇ॒ವಾನು॒ಪ್ರಾವಿ॑ಶತ್ | ತದ॑ನು ಪ್ರ॒ವಿಶ್ಯ॑ | ಸಚ್ಚ॒ ತ್ಯಚ್ಚಾ॑ಭವತ್ | ನಿ॒ರುಕ್ತಂ॒ ಚಾನಿ॑ರುಕ್ತಂ ಚ | ನಿ॒ಲಯ॑ನಂ॒ ಚಾನಿ॑ಲಯನಂ ಚ | ವಿ॒ಜ್ಞಾನಂ॒ ಚಾವಿ॑ಜ್ಞಾನಂ ಚ | ಸತ್ಯಂ ಚಾನೃತಂ ಚ ಸ॑ತ್ಯಮ॒ಭವತ್ | ಯದಿ॑ದಂ ಕಿಂ॒ಚ | ತತ್ಸತ್ಯಮಿ॑ತ್ಯಾಚ॒ಕ್ಷತೇ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಅಸ॒ದ್ವಾ ಇ॒ದಮಗ್ರ॑ ಆಸೀತ್ | ತತೋ॒ ವೈ ಸದ॑ಜಾಯತ | ತದಾತ್ಮಾನ ಸ್ವಯ॑ಮಕು॒ರುತ | ತಸ್ಮಾತ್ತತ್ಸುಕೃತಮುಚ್ಯ॑ತ ಇ॒ತಿ | ಯದ್ವೈ॑ ತತ್ ಸು॒ಕೃತಂ | ರ॑ಸೋ ವೈ॒ ಸಃ | ರಸꣳಹ್ಯೇವಾಯಂ ಲಬ್ಧ್ವಾಽಽನಂ॑ದೀ ಭ॒ವತಿ | ಕೋ ಹ್ಯೇವಾನ್ಯಾ᳚ತ್ಕಃ ಪ್ರಾ॒ಣ್ಯಾತ್ | ಯದೇಷ ಆಕಾಶ ಆನಂ॑ದೋ ನ॒ ಸ್ಯಾತ್ | ಏಷ ಹ್ಯೇವಾಽಽನಂ॑ದಯಾ॒ತಿ | ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನದೃಶ್ಯೇಽನಾತ್ಮ್ಯೇಽನಿರುಕ್ತೇಽನಿಲಯನೇಽಭಯಂ ಪ್ರತಿ॑ಷ್ಠಾಂ ವಿಂ॒ದತೇ | ಅಥ ಸೋಽಭಯಂ ಗ॑ತೋ ಭ॒ವತಿ | ಯ॒ದಾ ಹ್ಯೇ॑ವೈಷ॒ ಏತಸ್ಮಿನ್ನುದರಮಂತ॑ರಂ ಕು॒ರುತೇ | ಅಥ ತಸ್ಯ ಭ॑ಯಂ ಭ॒ವತಿ | ತತ್ತ್ವೇವ ಭಯಂ ವಿದುಷೋಽಮ॑ನ್ವಾನ॒ಸ್ಯ | ತದಪ್ಯೇಷ ಶ್ಲೋ॑ಕೋ ಭ॒ವತಿ ||

ಭೀ॒ಷಾಽಸ್ಮಾ॒ದ್ವಾತಃ॑ ಪವತೇ | ಭೀ॒ಷೋದೇ॑ತಿ॒ ಸೂರ್ಯಃ॑ | ಭೀಷಾಽಸ್ಮಾದಗ್ನಿ॑ಶ್ಚೇಂದ್ರ॒ಶ್ಚ | ಮೃತ್ಯುರ್ಧಾವತಿ ಪಂಚ॑ಮ ಇ॒ತಿ | ಸೈಷಾಽಽನಂದಸ್ಯ ಮೀಮಾ॑ꣳಸಾ ಭ॒ವತಿ | ಯುವಾ ಸ್ಯಾತ್ಸಾಧುಯು॑ವಾಽಧ್ಯಾ॒ಯಕಃ | ಆಶಿಷ್ಠೋ ದೃಢಿಷ್ಠೋ॑ ಬಲಿ॒ಷ್ಠಃ | ತಸ್ಯೇಯಂ ಪೃಥಿವೀ ಸರ್ವಾ ವಿತ್ತಸ್ಯ॑ ಪೂರ್ಣಾ॒ ಸ್ಯಾತ್ | ಸ ಏಕೋ ಮಾನುಷ॑ ಆನಂ॒ದಃ | ತೇ ಯೇ ಶತಂ ಮಾನುಷಾ॑ ಆನಂ॒ದಾಃ | ಸ ಏಕೋ ಮನುಷ್ಯಗಂಧರ್ವಾಣಾ॑ಮಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಮನುಷ್ಯಗಂಧರ್ವಾಣಾ॑ಮಾನಂ॒ದಾಃ | ಸ ಏಕೋ ದೇವಗಂಧರ್ವಾಣಾ॑ಮಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ದೇವಗಂಧರ್ವಾಣಾ॑ಮಾನಂ॒ದಾಃ | ಸ ಏಕಃ ಪಿತೃಣಾಂ ಚಿರಲೋಕಲೋಕಾನಾ॑ಮಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಪಿತೃಣಾಂ ಚಿರಲೋಕಲೋಕಾನಾ॑ಮಾನಂ॒ದಾಃ | ಸ ಏಕ ಆಜಾನಜಾನಾಂ ದೇವಾನಾ॑ಮಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಆಜಾನಜಾನಾಂ ದೇವಾನಾ॑ಮಾನಂ॒ದಾಃ | ಸ ಏಕಃ ಕರ್ಮದೇವಾನಾಂ ದೇವಾನಾ॑ಮಾನಂ॒ದಃ | ಯೇ ಕರ್ಮಣಾ ದೇವಾನ॑ಪಿಯಂ॒ತಿ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಕರ್ಮದೇವಾನಾಂ ದೇವಾನಾ॑ಮಾನಂ॒ದಾಃ | ಸ ಏಕೋ ದೇವಾನಾ॑ಮಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ದೇವಾನಾ॑ಮಾನಂ॒ದಾಃ | ಸ ಏಕ ಇಂದ್ರ॑ಸ್ಯಾಽಽನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಮಿಂದ್ರ॑ಸ್ಯಾಽಽನಂ॒ದಾಃ | ಸ ಏಕೋ ಬೃಹಸ್ಪತೇ॑ರಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಬೃಹಸ್ಪತೇ॑ರಾನಂ॒ದಾಃ | ಸ ಏಕಃ ಪ್ರಜಾಪತೇ॑ರಾನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ತೇ ಯೇ ಶತಂ ಪ್ರಜಾಪತೇ॑ರಾನಂ॒ದಾಃ | ಸ ಏಕೋ ಬ್ರಹ್ಮಣ॑ ಆನಂ॒ದಃ | ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ | ಸ ಯಶ್ಚಾ॑ಯಂ ಪು॒ರುಷೇ | ಯಶ್ಚಾಸಾ॑ವಾದಿ॒ತ್ಯೇ | ಸ ಏಕಃ॑ | ಸ ಯ॑ ಏವಂ॒ವಿತ್ | ಅಸ್ಮಾಲ್ಲೋ॑ಕಾತ್ಪ್ರೇ॒ತ್ಯ | ಏತಮನ್ನಮಯಮಾತ್ಮಾನಮುಪ॑ಸಂಕ್ರಾ॒ಮತಿ | ಏತಂ ಪ್ರಾಣಮಯಮಾತ್ಮಾನಮುಪ॑ಸಂಕ್ರಾ॒ಮತಿ | ಏತಂ ಮನೋಮಯಮಾತ್ಮಾನಮುಪ॑ಸಂಕ್ರಾ॒ಮತಿ | ಏತಂ ವಿಜ್ಞಾನಮಯಮಾತ್ಮಾನಮುಪ॑ಸಂಕ್ರಾ॒ಮತಿ | ಏತಮಾನಂದಮಯಮಾತ್ಮಾನಮುಪ॑ಸಂಕ್ರಾ॒ಮತಿ | ತದಪ್ಯೇಷ ಶ್ಲೋಕೋ॑ ಭ॒ವತಿ ||

ಯತೋ॒ ವಾಚೋ॒ ನಿವ॑ರ್ತಂತೇ | ಅಪ್ರಾ॑ಪ್ಯ॒ ಮನ॑ಸಾ ಸ॒ಹ | ಆನಂದಂ ಬ್ರಹ್ಮ॑ಣೋ ವಿ॒ದ್ವಾನ್ | ನ ಬಿಭೇತಿ ಕುತ॑ಶ್ಚನೇ॒ತಿ | ಏತꣳಹ ವಾವ॑ ನ ತ॒ಪತಿ | ಕಿಮಹꣳಸಾಧು॑ ನಾಕ॒ರವಂ | ಕಿಮಹಂ ಪಾಪಮಕರ॑ವಮಿ॒ತಿ | ಸ ಯ ಏವಂ ವಿದ್ವಾನೇತೇ ಆತ್ಮಾ॑ನ ಸ್ಪೃ॒ಣುತೇ | ಉ॒ಭೇ ಹ್ಯೇ॑ವೈಷ॒ ಏತೇ ಆತ್ಮಾ॑ನ ಸ್ಪೃ॒ಣುತೇ | ಯ ಏ॒ವಂ ವೇದ॑ | ಇತ್ಯು॑ಪ॒ನಿಷ॑ತ್ ||

<h4>ಭೃಗುವಲ್ಲೀ</h4>

ಓಂ ಸ॒ಹ ನಾ॑ವವತು | ಸ॒ಹ ನೌ॑ ಭುನಕ್ತು | ಸ॒ಹ ವೀ॒ರ್ಯಂ॑ ಕರವಾವಹೈ | ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ | ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||

ಭೃ॑ಗು॒ರ್ವೈ ವಾ॑ರು॒ಣಿಃ | ವರು॑ಣಂ॒ ಪಿತ॑ರ॒ಮುಪ॑ಸಸಾರ | ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ | ತಸ್ಮಾ॑ ಏ॒ತತ್ಪ್ರೋ॑ವಾಚ | ಅನ್ನಂ॑ ಪ್ರಾ॒ಣಂ ಚಕ್ಷುಃ॒ ಶ್ರೋತ್ರಂ॒ ಮನೋ॒ ವಾಚ॒ಮಿತಿ॑ | ತꣳಹೋ॑ವಾಚ | ಯತೋ॒ ವಾ ಇ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ | ಯೇನ॒ ಜಾತಾ॑ನಿ॒ ಜೀವಂ॑ತಿ | ಯತ್ಪ್ರಯಂ॑ತ್ಯ॒ಭಿಸಂವಿ॑ಶಂತಿ | ತದ್ವಿಜಿ॑ಜ್ಞಾಸಸ್ವ | ತದ್ಬ್ರಹ್ಮೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ | ಇತಿ ಪ್ರಥಮೋಽನುವಾಕಃ | ಅನ್ನಂ॒ ಬ್ರಹ್ಮೇತಿ॒ ವ್ಯ॑ಜಾನಾತ್ | ಅ॒ನ್ನಾದ್ಧ್ಯೇ॑ವ ಖಲ್ವಿ॒ಮಾನಿ॒ ಭುತಾ॑ನಿ॒ ಜಾಯಂ॒ತೇ | ಅನ್ನೇ॑ನ॒ ಜಾತಾ॑ನಿ॒ ಜೀವಂ॑ತಿ | ಅನ್ನಂ॒ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ | ತದ್ವಿ॒ಜ್ಞಾಯ॑ | ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ | ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ | ತꣳಹೋ॑ವಾಚ | ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ | ತಪೋ॒ ಬ್ರಹ್ಮೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ ||

ಪ್ರಾ॒ಣೋ ಬ್ರಹ್ಮೇತಿ॒ ವ್ಯ॑ಜಾನಾತ್ | ಪ್ರಾ॒ಣಾದ್ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ | ಪ್ರಾ॒ಣೇನ॒ ಜಾತಾ॑ನಿ॒ ಜೀವಂ॑ತಿ | ಪ್ರಾ॒ಣಂ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ | ತದ್ವಿ॒ಜ್ಞಾಯ॑ | ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ | ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ | ತꣳಹೋ॑ವಾಚ | ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ | ತಪೋ॒ ಬ್ರಹ್ಮೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ ||

ಮನೋ॒ ಬ್ರಹ್ಮೇತಿ॒ ವ್ಯ॑ಜಾನಾತ್ | ಮನ॑ಸೋ॒ ಹ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ | ಮನ॑ಸಾ॒ ಜಾತಾ॑ನಿ॒ ಜೀವಂ॑ತಿ | ಮನಃ॒ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ | ತದ್ವಿ॒ಜ್ಞಾಯ॑ | ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ | ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ | ತꣳಹೋ॑ವಾಚ | ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ | ತಪೋ॒ ಬ್ರಹ್ಮೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ ||

ವಿ॒ಜ್ಞಾನಂ॒ ಬ್ರಹ್ಮೇತಿ॒ ವ್ಯ॑ಜಾನಾತ್ | ವಿ॒ಜ್ಞಾನಾ॒ದ್ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ | ವಿ॒ಜ್ಞಾನೇ॑ನ॒ ಜಾತಾ॑ನಿ॒ ಜೀವಂ॑ತಿ | ವಿ॒ಜ್ಞಾನಂ॒ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ | ತದ್ವಿ॒ಜ್ಞಾಯ॑ | ಪುನ॑ರೇ॒ವ ವರು॑ಣಂ॒ ಪಿತ॑ರ॒ಮುಪ॑ಸಸಾರ | ಅಧೀ॑ಹಿ ಭಗವೋ॒ ಬ್ರಹ್ಮೇತಿ॑ | ತꣳಹೋ॑ವಾಚ | ತಪ॑ಸಾ॒ ಬ್ರಹ್ಮ॒ ವಿಜಿ॑ಜ್ಞಾಸಸ್ವ | ತಪೋ॒ ಬ್ರಹ್ಮೇತಿ॑ | ಸ ತಪೋ॑ಽತಪ್ಯತ | ಸ ತಪ॑ಸ್ತ॒ಪ್ತ್ವಾ ||

ಆ॒ನಂ॒ದೋ ಬ್ರ॒ಹ್ಮೇತಿ॒ ವ್ಯ॑ಜಾನಾತ್ | ಆ॒ನಂದಾ॒ಧ್ಯೇ॑ವ ಖಲ್ವಿ॒ಮಾನಿ॒ ಭೂತಾ॑ನಿ॒ ಜಾಯಂ॑ತೇ | ಆ॒ನಂ॒ದೇನ॒ ಜಾತಾ॑ನಿ॒ ಜೀವಂ॑ತಿ | ಆ॒ನಂ॒ದಂ ಪ್ರಯಂ॑ತ್ಯ॒ಭಿಸಂವಿ॑ಶಂ॒ತೀತಿ॑ | ಸೈಷಾ ಭಾ᳚ರ್ಗ॒ವೀ ವಾ॑ರು॒ಣೀ ವಿ॒ದ್ಯಾ | ಪ॒ರ॒ಮೇ ವ್ಯೋ॑ಮ॒ನ್ಪ್ರತಿ॑ಷ್ಠಿತಾ | ಸ ಯ ಏ॒ವಂ ವೇದ॒ ಪ್ರತಿ॑ತಿಷ್ಠತಿ | ಅನ್ನ॑ವಾನನ್ನಾ॒ದೋ ಭ॑ವತಿ | ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ | ಮ॒ಹಾನ್ ಕೀ॒ರ್ತ್ಯಾ ||

ಅನ್ನಂ॒ ನ ನಿಂ॑ದ್ಯಾತ್ | ತದ್॒ವ್ರತಂ | ಪ್ರಾ॒ಣೋ ವಾ ಅನ್ನಂ॑ | ಶರೀ॑ರಮನ್ನಾ॒ದಂ | ಪ್ರಾ॒ಣೇ ಶರೀ॑ರಂ॒ ಪ್ರತಿ॑ಷ್ಠಿತಂ | ಶರೀ॑ರೇ ಪ್ರಾ॒ಣಃ ಪ್ರತಿ॑ಷ್ಠಿತಃ | ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ | ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ | ಅನ್ನ॑ವಾನನ್ನಾ॒ದೋ ಭ॑ವತಿ | ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ | ಮ॒ಹಾನ್ ಕೀ॒ರ್ತ್ಯಾ ||

ಅನ್ನಂ॒ ನ ಪರಿ॑ಚಕ್ಷೀತ | ತದ್॒ವ್ರತಂ | ಆಪೋ॒ ವಾ ಅನ್ನಂ॑ | ಜ್ಯೋತಿ॑ರನ್ನಾ॒ದಂ | ಅ॒ಪ್ಸು ಜ್ಯೋತಿಃ॒ ಪ್ರತಿ॑ಷ್ಠಿತಂ | ಜ್ಯೋತಿ॒ಷ್ಯಾಪಃ॒ ಪ್ರತಿ॑ಷ್ಠಿತಾಃ | ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ | ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ | ಅನ್ನ॑ವಾನನ್ನಾ॒ದೋ ಭ॑ವತಿ | ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ | ಮ॒ಹಾನ್ ಕೀ॒ರ್ತ್ಯಾ ||

ಅನ್ನಂ॑ ಬ॒ಹು ಕು॑ರ್ವೀತ | ತದ್॒ವ್ರತಂ | ಪೃ॒ಥಿ॒ವೀ ವಾ ಅನ್ನಂ॑ | ಆ॒ಕಾ॒ಶೋ᳚ಽನ್ನಾ॒ದಃ | ಪೃ॒ಥಿ॒ವ್ಯಾಮಾ॑ಕಾ॒ಶಃ ಪ್ರತಿ॑ಷ್ಠಿತಃ | ಆ॒ಕಾ॒ಶೇ ಪೃ॑ಥಿ॒ವೀ ಪ್ರತಿ॑ಷ್ಠಿತಾ | ತದೇ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ | ಸ ಯ ಏ॒ತದನ್ನ॒ಮನ್ನೇ॒ ಪ್ರತಿ॑ಷ್ಠಿತಂ॒ ವೇದ॒ ಪ್ರತಿ॑ತಿಷ್ಠತಿ | ಅನ್ನ॑ವಾನನ್ನಾ॒ದೋ ಭ॑ವತಿ | ಮ॒ಹಾನ್ಭ॑ವತಿ ಪ್ರ॒ಜಯಾ॑ ಪ॒ಶುಭಿ॑ರ್ಬ್ರಹ್ಮವರ್ಚ॒ಸೇನ॑ | ಮ॒ಹಾನ್ ಕೀ॒ರ್ತ್ಯಾ ||

ನ ಕಂಚನ ವಸತೌ ಪ್ರತ್ಯಾ॑ಚಕ್ಷೀ॒ತ | ತದ್॒ವ್ರತಂ | ತಸ್ಮಾದ್ಯಯಾ ಕಯಾ ಚ ವಿಧಯಾ ಬಹ್ವ॑ನ್ನಂ ಪ್ರಾ॒ಪ್ನುಯಾತ್ | ಅರಾಧ್ಯಸ್ಮಾ ಅನ್ನಮಿ॑ತ್ಯಾಚ॒ಕ್ಷತೇ | ಏತದ್ವೈ ಮುಖತೋ᳚ಽನ್ನꣳ ರಾ॒ದ್ಧಂ | ಮುಖತೋಽಸ್ಮಾ ಅ॑ನ್ನꣳ ರಾ॒ಧ್ಯತೇ | ಏತದ್ವೈ ಮಧ್ಯತೋ᳚ಽನ್ನꣳ ರಾ॒ದ್ಧಂ | ಮಧ್ಯತೋಽಸ್ಮಾ ಅ॑ನ್ನꣳ ರಾ॒ಧ್ಯತೇ | ಏದದ್ವಾ ಅಂತತೋ᳚ಽ॑ನ್ನꣳ ರಾ॒ದ್ಧಂ | ಅಂತತೋಽಸ್ಮಾ ಅ॑ನ್ನ॑ ರಾ॒ಧ್ಯತೇ | ಯ ಏ॑ವಂ ವೇ॒ದ | ಕ್ಷೇಮ ಇ॑ತಿ ವಾ॒ಚಿ | ಯೋಗಕ್ಷೇಮ ಇತಿ ಪ್ರಾ॑ಣಾಪಾ॒ನಯೋಃ | ಕರ್ಮೇ॑ತಿ ಹ॒ಸ್ತಯೋಃ | ಗತಿರಿ॑ತಿ ಪಾ॒ದಯೋಃ | ವಿಮುಕ್ತಿರಿ॑ತಿ ಪಾ॒ಯೌ | ಇತಿ ಮಾನುಷೀಃ᳚ ಸಮಾ॒ಜ್ಞಾಃ | ಅಥ ದೈ॒ವೀಃ | ತೃಪ್ತಿರಿ॑ತಿ ವೃ॒ಷ್ಟೌ | ಬಲಮಿ॑ತಿ ವಿ॒ದ್ಯುತಿ | ಯಶ ಇ॒ತಿ ಪ॒ಶುಷು | ಜ್ಯೋತಿರಿತಿ ನ॑ಕ್ಷತ್ರೇ॒ಷು | ಪ್ರಜಾತಿರಮೃತಮಾನಂದ ಇ॑ತ್ಯುಪ॒ಸ್ಥೇ | ಸರ್ವಮಿ॑ತ್ಯಾಕಾ॒ಶೇ | ತತ್ಪ್ರತಿಷ್ಠೇತ್ಯು॑ಪಾಸೀ॒ತ | ಪ್ರತಿಷ್ಠಾ॑ವಾನ್ ಭ॒ವತಿ | ತನ್ಮಹ ಇತ್ಯು॑ಪಾಸೀ॒ತ | ಮ॑ಹಾನ್ಭ॒ವತಿ | ತನ್ಮನ ಇತ್ಯು॑ಪಾಸೀ॒ತ | ಮಾನ॑ವಾನ್ಭ॒ವತಿ | ತನ್ನಮ ಇತ್ಯು॑ಪಾಸೀ॒ತ | ನಮ್ಯಂತೇ᳚ಽಸ್ಮೈ ಕಾ॒ಮಾಃ | ತದ್ಬ್ರಹ್ಮೇತ್ಯು॑ಪಾಸೀ॒ತ | ಬ್ರಹ್ಮ॑ವಾನ್ಭ॒ವತಿ | ತದ್ಬ್ರಹ್ಮಣಃ ಪರಿಮರ ಇತ್ಯು॑ಪಾಸೀ॒ತ | ಪರ್ಯೇಣಂ ಮ್ರಿಯಂತೇ ದ್ವಿಷಂತಃ॑ ಸಪ॒ತ್ನಾಃ | ಪರಿ ಯೇ᳚ಽಪ್ರಿಯಾ᳚ ಭ್ರಾತೃ॒ವ್ಯಾಃ | ಸ ಯಶ್ಚಾ॑ಯಂ ಪು॒ರುಷೇ | ಯಶ್ಚಾಸಾ॑ವಾದಿ॒ತ್ಯೇ | ಸ ಏಕಃ॑ | ಸ ಯ॑ ಏವಂ॒ವಿತ್ | ಅಸ್ಮಾಲ್ಲೋ॑ಕಾತ್ಪ್ರೇ॒ತ್ಯ | ಏತಮನ್ನಮಯಮಾತ್ಮಾನಮುಪ॑ಸಂಕ್ರ॒ಮ್ಯ | ಏತಂ ಪ್ರಾಣಮಯಮಾತ್ಮಾನಮುಪ॑ಸಂಕ್ರ॒ಮ್ಯ | ಏತಂ ಮನೋಮಯಮಾತ್ಮಾನಮುಪ॑ಸಂಕ್ರ॒ಮ್ಯ | ಏತಂ ವಿಜ್ಞಾನಮಯಮಾತ್ಮಾನಮುಪ॑ಸಂಕ್ರ॒ಮ್ಯ | ಏತಮಾನಂದಮಯಮಾತ್ಮಾನಮುಪ॑ಸಂಕ್ರ॒ಮ್ಯ | ಇಮಾಁಲ್ಲೋಕನ್ಕಾಮಾನ್ನೀ ಕಾಮರೂಪ್ಯ॑ನುಸಂ॒ಚರನ್ | ಏತತ್ ಸಾಮ ಗಾ॑ಯನ್ನಾ॒ಸ್ತೇ | ಹಾ ೩ ವು॒ ಹಾ ೩ ವು॒ ಹಾ ೩ ವು॑ | ಅ॒ಹಮನ್ನಮ॒ಹಮನ್ನಮ॒ಹಮನ್ನಂ | ಅ॒ಹಮನ್ನಾ॒ದೋಽ॒೩ಹಮನ್ನಾ॒ದೋಽ॒೩ಅಹಮನ್ನಾ॒ದಃ | ಅ॒ಹꣳಶ್ಲೋಕ॒ಕೃದ॒ಹꣳಶ್ಲೋಕ॒ಕೃದ॒ಹꣳಶ್ಲೋಕ॒ಕೃತ್ | ಅ॒ಹಮಸ್ಮಿ ಪ್ರಥಮಜಾ ಋತಾ೩ಸ್ಯ॒ | ಪೂರ್ವಂ ದೇವೇಭ್ಯೋಽಮೃತಸ್ಯ ನಾ೩ಭಾ॒ಇ॒ | ಯೋ ಮಾ ದದಾತಿ ಸ ಇದೇವ ಮಾ೩ಅಽವಾಃ॒ | ಅ॒ಹಮನ್ನ॒ಮನ್ನ॑ಮ॒ದಂತ॒ಮಾ೩ದ್ಮಿ॒ | ಅ॒ಹಂ ವಿಶ್ವಂ॒ ಭುವ॑ನ॒ಮಭ್ಯ॑ಭ॒ವಾ೩ಮ್ | ಸುವ॒ರ್ನ ಜ್ಯೋತೀಃ᳚ | ಯ ಏ॒ವಂ ವೇದ॑ | ಇತ್ಯು॑ಪ॒ನಿಷ॑ತ್ ||

ಓಂ ಸ॒ಹ ನಾ॑ವವತು | ಸ॒ಹ ನೌ॑ ಭುನಕ್ತು | ಸ॒ಹ ವೀ॒ರ್ಯಂ॑ ಕರವಾವಹೈ | ತೇ॒ಜ॒ಸ್ವಿ ನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ | ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||