ಚಂದನಚರ್ಚಿತ ನೀಲಕಲೇವರ
Category: ಶ್ರೀಕೃಷ್ಣ
Author: ಜಯದೇವ
ಚಂದನಚರ್ಚಿತ-ನೀಲಕಲೇವರ-ಪೀತವಸನ-ವನಮಾಲಿನ್ ।
ಕೇಲಿಚಲನ್ಮಣಿ-ಕುಂಡಲಮಂಡಿತ-ಗಂಡಯುಗ-ಸ್ಮಿತಶಾಲಿನ್ ॥ ೧॥
ಚಂದ್ರಕ-ಚಾರು-ಮಯೂರ-ಶಿಖಂಡಕ-ಮಂಡಲ-ವಲಯಿತ-
ಕೇಶಮ್ |
ಪ್ರಚುರ-ಪುರಂದರ-ಧನುರನುರಂಜಿತ-ಮೇದುರ-ಮುದಿರ-
ಸುವೇಶಮ್ ॥ ೨॥
ಸಂಚರದಧರ-ಸುಧಾ-ಮಧುರ-ಧ್ವನಿ-ಮುಖರಿತ-ಮೋಹನ-
ವಂಶಮ್ |
ವಲಿತ-ದೃಗಂಚಲ-ವಂಚಲ-ಮೌಲಿ-ಕಪೋಲ-ವಿಲೋಲ-
ವತಂಸಮ್ ॥ ೩॥
ಹಾರಮಮಲತರ-ತಾರಮುರಸಿ ದಧತಂ ಪರಿರಭ್ಯ ವಿದೂರಮ್ |
ಸ್ಫುಟತರ-ಫೇನ-ಕದಂಬ-ಕರಂಬಿತಮಿವ ಯಮುನಾ-ಜಲ-ಪೂರಮ್ ॥ ೪॥
ಶ್ಯಾಮಲ-ಮೃದುಲ-ಕಲೇವರ-ಮಂಡಲಮಧಿಗತಗೌರ-ದುಕೂಲಮ್ |
ನೀಲ-ನಲಿನಮಿವ ಪೀತ-ಪರಾಗ-ಪಟಲ-ಭರ-ವಲಯಿತ-
ಮೂಲಮ್ ॥ ೫॥
ವದನಕಮಲ-ಪರಿಶೀಲನ-ಮಿಲಿತ-ಮಿಹಿರ-ಸಮ-ಕುಂಡಲ-ಶೋಭಮ್ |
ಬಂಧುಜೀವ-ಮಧುರಾಧರ-ಪಲ್ಲವಮುಲ್ಲಸಿತ-ಸ್ಥಿತ-ಶೋಭಮ್॥೬ ॥
ವಿಶದ-ಕದಂಬ-ತಲೇ ಮಿಲಿತಂ ಕಲಿಕಲುಷ-ಭಯಂಶಮಯಂತಮ್।
ಕರಚರಣೋರಸಿ ಮಣಿಗಣ-ಭೂಷಣ-ಕಿರಣ-ವಿಭಿನ್ನ-
ತಮಿಸ್ರಮ್ ॥ ೭॥
ಶಶಿಕಿರಣೋಚ್ಛುರಿತೋಧರ-ಜಲಧರ-ಸುಂದರ-ಸಕುಸುಮ-ಕೇಶಮ್ ।
ತಿಮಿರೋದಿತ-ವಿಧುಮಂಡಲ-ನಿರ್ಮಲ-ಮಲಯಜ-ತಿಲಕ-ನಿವೇಶಮ್ ॥ ೮॥
ಶ್ರೀಜಯದೇವಭಣಿತ-ವಿಭವ-ದ್ವಿಗುಣೀಕೃತ-ಭೂಷಣ-ಭಾರಮ್ |
ಪ್ರಣಮತ ಹೃದಿ ವಿನಿಧಾಯ ಹರಿಂ ಸುಚಿರಂ ಸುಕೃತೋದಯ-ಸಾರಮ್ ॥ ೯॥
Advertisements
