ಮೃತ್ಯುನಿವಾರಣ ಮಂತ್ರಾಃ

ಅಪೈ॑ತು ಮೃ॒ತ್ಯು-ರ॒ಮೃತ॑ನ್ನ॒ ಆಗ॑ನ್. ವೈವಸ್ವ॒ತೋ ನೋ॒ ಅಭ॑ಯಂಕೃಣೋತು । ಪ॒ರ್ಣಂ-ವಁನ॒ಸ್ಪತೇ॑ ರಿವಾ॒ಭಿನಃ॑ ಶೀಯತಾಗ್ಂ ರ॒ಯಿಃ ಸಚ॑ತಾನ್ನಃ॒ ಶಚೀ॒ಪತಿಃ॑ ॥

ಪರಂ॑ ಮೃತ್ಯೋ॒ ಅನು॒ ಪರೇ॑ಹಿ॒ ಪಂಥಾಂ॒-ಯಁಸ್ತೇ॒ಸ್ವ ಇತ॑ರೋ ದೇವ॒ಯಾನಾ᳚ತ್ । ಚಕ್ಷು॑ಷ್ಮತೇ ಶೃಣ್ವ॒ತೇ ತೇ᳚ ಬ್ರವೀಮಿ॒ ಮಾನಃ॑ ಪ್ರ॒ಜಾಗ್ಂ ರೀ॑ರಿಷೋ॒ ಮೋತ ವೀ॒ರಾನ್ ॥

ವಾತಂ॑ ಪ್ರಾ॒ಣಂ ಮನ॑ಸಾ॒ ನ್ವಾರ॑ಭಾಮಹೇ ಪ್ರ॒ಜಾಪ॑ತಿಂ॒-ಯೋಁ ಭುವ॑ನಸ್ಯ ಗೋ॒ಪಾಃ । ಸನೋ॑ ಮೃ॒ತ್ಯೋ ಸ್ತ್ರಾ॑ಯತಾಂ॒ ಪಾತ್ವಗ್ಂಹ॑ಸೋ॒ ಜ್ಯೋಗ್ ಜೀ॒ವಾ ಜ॒ರಾಮ॑ಶೀಮಹಿ ॥

ಅ॒ಮು॒ತ್ರ॒ ಭೂಯಾ॒ದಧ॒ ಯದ್ಯ॒ಮಸ್ಯ॒ ಬೃಹ॑ಸ್ಪತೇ ಅ॒ಭಿಶ॑ಸ್ತೇ॒ರ ಮುಂ॑ಚಃ । ಪ್ರತ್ಯೌ॑ಹತಾ ಮ॒ಶ್ವಿನಾ॑ ಮೃ॒ತ್ಯು ಮ॑ಸ್ಮಾ-ದ್ದೇ॒ವಾನಾ॑ಮಗ್ನೇ ಭಿ॒ಷಜಾ॒ ಶಚೀ॑ಭಿಃ ॥

ಹರಿ॒ಗ್ಂ॒ ಹರಂ॑ತ॒- ಮನು॑ಯಂತಿ ದೇ॒ವಾ ವಿಶ್ವ॒ಸ್ಯೇಶಾ॑ನಂ-ವೃಁಷ॒ಭಂ ಮ॑ತೀ॒ನಾಮ್ । ಬ್ರಹ್ಮ॒ ಸರೂ॑ಪ॒-ಮನು॑ಮೇ॒ದಮಾ॑ಗಾ॒-ದಯ॑ನಂ॒ ಮಾ ವಿವ॑ಧೀ॒-ರ್ವಿಕ್ರ॑ಮಸ್ವ ॥

ಶಲ್ಕೈ॑ರ॒ಗ್ನಿ-ಮಿಂ॑ಧಾ॒ನ ಉ॒ಭೌ ಲೋ॒ಕೌ ಸ॑ನೇಮ॒ಹಮ್ । ಉ॒ಭಯೋ᳚ ರ್ಲೋ॒ಕಯಾ॑-ರ್​ಋ॒ಧ್ದ್ವಾಽತಿ॑ ಮೃ॒ತ್ಯುಂ ತ॑ರಾಮ್ಯ॒ಹಮ್ ॥

ಮಾ ಛಿ॑ದೋ ಮೃತ್ಯೋ॒ ಮಾ ವ॑ಧೀ॒ರ್​ಮಾ ಮೇ॒ ಬಲಂ॒-ವಿಁವೃ॑ಹೋ॒ ಮಾ ಪ್ರಮೋ॑ಷೀಃ । ಪ್ರ॒ಜಾಂ ಮಾ ಮೇ॑ ರೀರಿಷ॒ ಆಯು॑ರುಗ್ರ ನೃ॒ಚಕ್ಷ॑ಸಂ ತ್ವಾ ಹ॒ವಿಷಾ॑ ವಿಧೇಮ ॥

ಮಾ ನೋ॑ ಮ॒ಹಾಂತ॑ಮು॒ತ ಮಾ ನೋ॑ ಅರ್ಭ॒ಕಂ ಮಾ ನ॒ ಉಕ್ಷಂ॑ತಮು॒ತ ಮಾ ನ॑ ಉಕ್ಷಿ॒ತಮ್ । ಮಾ ನೋ॑ ವಧೀಃ ಪಿ॒ತರಂ॒ ಮೋತ ಮಾ॒ತರಂ॑ ಪ್ರಿ॒ಯಾ ಮಾ ನ॑ಸ್ತ॒ನುವೋ॑ ರುದ್ರ ರೀರಿಷಃ ॥

ಮಾ ನ॑ಸ್ತೋ॒ಕೇ ತನ॑ಯೇ॒ ಮಾ ನ॒ ಆಯು॑ಷಿ॒ ಮಾ ನೋ॒ ಗೋಷು॒ ಮಾ ನೋ॒ ಅಶ್ವೇ॑ಷು ರೀರಿಷಃ । ವೀ॒ರಾನ್ಮಾ ನೋ॑ ರುದ್ರ ಭಾಮಿ॒ತೋವ॑ಧೀರ್​ಹ॒ವಿಷ್ಮಂ॑ತೋ॒ ನಮ॑ಸಾ ವಿಧೇಮ ತೇ ॥