ಐತರೇಯೋಪನಿಷತ್

ಓಂ ವಾಙ್ಮೇ॒ ಮನ॑ಸಿ॒ ಪ್ರತಿ॑ಷ್ಠಿತಾ॒ ಮನೋ᳚ ಮೇ॒ ವಾಚಿ॒
ಪ್ರತಿ॑ಷ್ಠಿತಮಾ॒ವಿರಾ॒ವೀರ್ಮ॑ ಏಧಿ ವೇ॒ದಸ್ಯ ಮ॒ ಆಣೀ᳚ಸ್ಥಃ ಶ್ರು॒ತಂ ಮೇ॒ ಮಾ
ಪ್ರಹಾ᳚ಸೀರ॒ನೇನಾ॒ಧೀತೇ᳚ ನಾಹೋರಾ॒ತ್ರಾನ್ ಸಂದ॑ಧಾಮ್ಯೃ॒ತಂ ವ॑ದಿಷ್ಯಾಮಿ ಸ॒ತ್ಯಂ ವ॑ದಿಷ್ಯಾಮಿ॒ ತನ್ಮಾಮ॑ವತು॒ ತದ್ವ॒ಕ್ತಾರ॑ಮವ॒ತ್ವವ॑ತು॒ ಮಾಮವ॑ತು ವ॒ಕ್ತಾರ॒ಮವ॑ತು ವ॒ಕ್ತಾರಂ᳚ || ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||

ಪ್ರಥಮೋಽಧ್ಯಾಯಃ |

ಪ್ರಥಮಃ ಖಂಡಃ

ಆತ್ಮಾ ವಾ ಇದಮೇಕ ಏವಾ᳚ಗ್ರ ಆಸೀನ್ನಾನ್ಯತ್ಕಿಂಚ॑ನ ಮಿ॒ಷತ್ |
ಸ ಈಕ್ಷತ ಲೋಕಾನ್ನು ಸೃ॑ಜಾ ಇ॒ತಿ || ೧ ||

ಸ ಇ॒ಮಾಂಲ್ಲೋಕಾನಸೃಜತ | ಅಂಭೋ ಮರೀಚೀರ್ಮರಮಾ᳚ಪೋಽದೋಽಮ್ಭಃ ಪರೇಣ
ದಿ॒ವಂ ದ್ಯೌಃ ಪ್ರತಿಷ್ಠಾ᳚ಽನ್ತರಿ॑ಕ್ಷಂ ಮರೀಚ॒ಯಃ |
ಪೃ॒ಥಿವೀ ಮರೋ ಯಾ ಅ॒ಧಸ್ತಾತ್ತಾ ಆ॒ಪಃ || ೨ ||

ಸ ಈಕ್ಷತೇಮೇ ನು ಲೋಕಾ ಲೋಕಪಾಲಾನ್ನು ಸೃ॑ಜಾ ಇ॒ತಿ |
ಸೋಽದ್ಭ್ಯ ಏವ ಪುರುಷಂ ಸಮುದ್ಧೃತ್ಯಾ᳚ಮೂರ್ಚ್ಛ॒ಯತ್ || ೩ ||

ತಮಭ್ಯ॑ತಪತ್ತಸ್ಯಾಭಿತಪ್ತಸ್ಯ ಮುಖಂ ನಿರ॑ಭಿ॒ದ್ಯತ ಯಥಾಽಣ್ಡಂ |
ಮುಖಾದ್ವಾಗ್ವಾಚೋ᳚ಽಗ್ನಿರ್ನಾಸಿಕೇ ನಿರ॑ಭಿದ್ಯೇತಾಂ ನಾಸಿಕಾಭ್ಯಾಂ ಪ್ರಾ॒ಣಃ
ಪ್ರಾ॒ಣಾದ್ವಾ॒ಯುರಕ್ಷಿಣೀ ನಿರ॑ಭಿದ್ಯೇತಾಮ॒ಕ್ಷೀಭ್ಯಾಂ ಚಕ್ಷು॒ಶ್ಚಕ್ಷುಷ॑
ಆದಿ॒ತ್ಯಃ ಕ॒ರ್ಣೌ ನಿರ॑ಭಿದ್ಯೇತಾಂ ಕರ್ಣಾಭ್ಯಾಂ ಶ್ರೋತ್ರಂ॒ ಶ್ರೋತ್ರದ್ದಿಶ॒ಸ್ತ್ವಙ್
ನಿರ॑ಭಿದ್ಯತ ತ್ವಚೋ ಲೋಮಾನಿ ಲೋಮಭ್ಯ ಓಷಧಿವನಸ್ಪತಯೋ ಹೃ॒ದಯಂ ನಿರ॑ಭಿದ್ಯತ ಹೃ॒ದಯಾನ್ಮನೋ ಮನಸಶ್ಚಂ॒ದ್ರಮಾ ನಾಭಿರ್ನಿರ॑ಭಿದ್ಯತ ನಾ॒ಭ್ಯಾ ಅಪಾನೋಽಪಾನಾನ್ಮೃ॒ತ್ಯುಃ ಶಿಶ್ನಂ ನಿರ॑ಭಿದ್ಯತ ಶಿಶ್ನಾ॒ದ್ರೇತೋ᳚ ರೇತ॑ಸ ಆ॒ಪಃ || ೪ ||

ದ್ವಿತೀಯಃ ಖಂಡಃ

ತಾ ಏ॒ತಾ ದೇ॒ವತಾಃ ಸೃ॒ಷ್ಟಾ ಅ॒ಸ್ಮಿನ್ಮಹತ್ಯರ್ಣವೇ ಪ್ರಾಪತಂಸ್ತಮಶನಾಯಾಪಿಪಾಸಾಭ್ಯಾಮ᳚ನ್ವವಾರ್ಜತ್ |
ತಾ ಏನಮಬ್ರುವನ್ನಾಯತನಂ ನಃ ಪ್ರ॑ಜಾನೀ॒ಹಿ ಯ॒ಸ್ಮಿನ್ಪ್ರತಿಷ್ಠಿತಾ ಅ॒ನ್ನಮ॑ದಾಮೇತಿ || ೧ ||

ತಾಭ್ಯೋ ಗಾಮಾನಯತ್ತಾ ಅಬ್ರುವನ್ನ ವೈ ನೋಽಯಮ॑ಲಮಿ॒ತಿ |
ತಾಭ್ಯೋಽಶ್ವಮಾನಯತ್ತಾ ಅಬ್ರುವನ್ನ ವೈ ನೋಽಯಮ॑ಲಮಿ॒ತಿ || ೨ ||

ತಾಭ್ಯಃ ಪುರುಷಮಾನಯತ್ತಾ ಅಬ್ರುವನ್ ಸುಕೃತಂ᳚ ಬತೇ॒ತಿ ಪುರುಷೋ ವಾವ॑ ಸುಕೃತಂ |ತಾ ಅಬ್ರವೀದ್ಯಥಾಽಽದಯತನಂ ಪ್ರವಿ॑ಶತೇ॒ತಿ || ೩ ||

ಅ॒ಗ್ನಿರ್ವಾಗ್ಭೂತ್ವಾ ಮುಖಂ᳚ ಪ್ರಾವಿಶದ್ವಾ॒ಯುಃ ಪ್ರಾಣೋ ಭೂತ್ವಾ ನಾಸಿಕೇ᳚
ಪ್ರಾವಿಶದಾದಿತ್ಯಶ್ಚಕ್ಷುರ್ಭೂತ್ವಾಽಕ್ಷಿಣೀ᳚ ಪ್ರಾವಿಶಾದ್ದಿಶಃ॑ ಶ್ರೋತ್ರಂ ಭೂತ್ವಾ ಕರ್ಣೌ᳚ ಪ್ರಾವಿಶನ್ನೋಷಧಿವನಸ್ಪತಯೋ ಲೋಮಾ᳚ನಿ ಭೂತ್ವಾ ತ್ವಚಂ᳚ ಪ್ರಾವಿಶಂಶ್ಚಂ॒ದ್ರಮಾ ಮನೋ ಭೂತ್ವಾ ಹೃದಯಂ᳚ ಪ್ರಾವಿಶನ್ಮೃ॒ತ್ಯುರಪಾನೋ ಭೂತ್ವಾ ನಾಭಿಂ᳚ ಪ್ರಾವಿಶದಾಪೋ ರೇತೋ ಭೂತ್ವಾ ಶಿಶ್ನಂ᳚ ಪ್ರಾವಿಶನ್ || ೪ ||

ತಮಶನಾಯಾಪಿಪಾಸೇ ಅಬ್ರೂತಾಮಾವಾಭ್ಯಾಮಭಿಪ್ರಜಾನೀಹೀ॒ತಿ |
ಸ ತೇ ಅಬ್ರವೀದೇತಾಸ್ವೇವ ವಾಂ ದೇವತಾಸ್ವಾಭ॑ಜಾಮ್ಯೇ॒ತಾಸು ಭಾಗಿನ್ನ್ಯೌ ಕ॑ರೋಮೀ॒ತಿ | ತಸ್ಮಾದ್ಯಸ್ಯೈ ಕಸ್ಯೈ ಚ ದೇ॒ವತಾಯೈ ಹವಿರ್ಗೃ॒ಹ್ಯತೇ ಭಾಗಿನ್ಯಾವೇವಾಸ್ಯಾಮಶನಾಯಾಪಿಪಾ᳚ಸೇ ಭ॒ವತಃ || ೫ ||

ತೃತೀಯಃ ಖಂಡಃ

ಸ ಈಕ್ಷತೇಮೇ ನು ಲೋಕಾಶ್ಚ ಲೋಕಪಾಲಾಶ್ಚಾನ್ನಮೇಭ್ಯಃ ಸೃ॑ಜಾ ಇ॒ತಿ || ೧ ||

ಸೋಽಪೋಭ್ಯ॑ತಪತ್ತಾಭ್ಯೋಽಭಿತಪ್ತಾಭ್ಯೋ ಮೂರ್ತಿರ॑ಜಾಯ॒ತ ಯೋ ವೈ ಸಾ ಮೂರ್ತಿರಜಾಯತಾಽನ್ನಂ ವೈ॒ ತತ್ || ೨ ||

ತದೇತದಭಿಸೃಷ್ಟಂ ಪರಾಙತ್ಯಜಿಘಾಂಸತ್ತದ್ವಾ॒ಚಾ ಜಿಘೃಕ್ಷತ್ತ॒ನ್ನಾ ಶಕ್ನೋದ್ವಾ॒ಚಾ ಗ್ರ॑ಹೀತುಂ |
ಸ ಯದ್ಧೈನದ್ವಾ॒ಚಾಽಗ್ರಹೈಷ್ಯದ॒ಭಿವ್ಯಾಹೃತ್ಯ ಹೈ॒ವಾನ್ನ॑ಮತ್ರ॒ಪ್ಸ್ಯತ್ || ೩ ||

ತತ್ಪ್ರಾ॒ಣೇನಾಜಿಘೃಕ್ಷತ್ತ॒ನ್ನಾಶಕ್ನೋತ್ ಪ್ರಾ॒ಣೇನ ಗ್ರ॑ಹೀತುಂ |
ಸ ಯದ್ಧೈನತ್ಪ್ರಾ॒ಣೇನಾಗ್ರ॑ಹೈಷ್ಯದ॒ಭಿಪ್ರಾಣ್ಯ ಹೈ॒ವಾನ್ನ॑ಮತ್ರ॒ಪ್ಸ್ಯತ್ || ೪ ||

ತಚ್ಚ॒ಕ್ಷುಷಾಽಜಿಘೃಕ್ಷತ್ತ॒ನ್ನಾಶಕ್ನೋಚ್ಚ॒ಕ್ಷುಷಾ ಗ್ರ॑ಹೀತುಂ |
ಸ ಯದ್ಧೈನಚ್ಚ॒ಕ್ಷುಷಾಽಗ್ರ॑ಹೈಷ್ಯದ್ ದೃ॒ಷ್ಟ್ವಾ ಹೈವಾನ್ನ॑ಮತ್ರ॒ಪ್ಸ್ಯತ್ || ೫ ||

ತಚ್ಛ್ರೋ॒ತ್ರೇಣಾಜಿಘೃಕ್ಷತ್ತ॒ನ್ನಾಶಕ್ನೋಚ್ಛ್ರೋ॒ತ್ರೇಣ ಗ್ರ॑ಹೀತುಂ |
ಸ ಯದ್ಧೈನ॒ಚ್ಛ್ರೋತ್ರೇಣಾಗ್ರಹೈಷ್ಯಚ್ಛ್ರು॒ತ್ವಾ ಹೈ॒ವಾನ್ನ॑ಮತ್ರ॒ಪ್ಸ್ಯತ್ || ೬ ||

ತತ್ತ್ವ॒ಚಾಽಜಿಘೃಕ್ಷತ್ತ॒ನ್ನಾಶಕ್ನೋತ್ ತ್ವ॒ಚಾ ಗ್ರ॑ಹೀತುಂ |
ಸ ಯದ್ಧೈನತ್ವ॒ಚಾಽಗ್ರಹೈಷ್ಯತ್ಸ್ಪೃ॒ಷ್ಟ್ವಾ ಹೈ॒ವಾನ್ನ॑ಮತ್ರ॒ಪ್ಸ್ಯತ್ || ೭ ||

ತನ್ಮ॒ನಸಾಽಜಿಘೃಕ್ಷತ್ತನ್ನಾಶಕ್ನೋನ್ಮ॒ನಸಾ ಗ್ರ॑ಹೀತುಂ |
ಸ ಯದ್ಧೈನನ್ಮ॒ನಸಾಽಗ್ರಹೈಷ್ಯದ್ಧಯಾ॒ತ್ವಾ ಹೈ॒ವಾನ್ನ॑ಮತ್ರ॒ಪ್ಸ್ಯತ್ || ೮ ||

ತಚ್ಛಿ॒ಶ್ನೇನಾಜಿಘೃಕ್ಷತ್ತ॒ನ್ನಾಶಕ್ನೋಚ್ಛಿ॒ಶ್ನೇನ ಗ್ರ॑ಹೀತುಂ |
ಸ ಯದ್ಧೈನಚ್ಛಿ॒ಶ್ನೇನಾಗ್ರಹೈಷ್ಯದ್ವಿ॒ಸೃಜ್ಯ ಹೈ॒ವಾನ್ನ॑ಮತ್ರಪ್ಸ್ಯತ್ || ೯ ||

ತದ॒ಪಾನೇನಾಜಿಘೃಕ್ಷತ್ತ॒ದಾವಯತ್ |
ಸ ಏಷೋಽನ್ನಸ್ಯ ಗ್ರಹೋ ಯದ್ವಾಯುರನ್ನಮಾಯುರ್ವಾ ಏ॒ಷ ಯ॒ದ್ವಾಯುಃ || ೧೦ ||

ಸ ಈಕ್ಷತ ಕಥಂ ನ್ವಿದಂ ಮದೃತೇ ಸ್ಯಾದಿ॒ತಿ ಸ ಈಕ್ಷತ ಕತರೇಣ ಪ್ರಪದ್ಯಾ ಇ॒ತಿ |
ಸ ಈಕ್ಷತ ಯದಿ ವಾ॒ಚಾಽಭಿವ್ಯಾಹೃತಂ ಯದಿ ಪ್ರಾ॒ಣೇನಾಭಿಪ್ರಾಣಿತಂ ಯದಿ ಚ॒ಕ್ಷುಷಾ ದೃ॒ಷ್ಟಂ ಯದಿ ಶ್ರೋ॒ತ್ರೇಣ ಶ್ರು॒ತಂ ಯದಿ ತ್ವ॒ಚಾ ಸ್ಪೃ॒ಷ್ಟಂ ಯದಿ ಮ॒ನಸಾ ಧ್ಯಾ॒ತಂ ಯದ್ಯ॒ಪಾನೇನಾಭ್ಯಪಾನಿತಂ
ಯದಿ ಶಿ॒ಶ್ನೇನ ವಿಸೃಷ್ಟಮಥ ಕೋ᳚ಽಹಮಿ॒ತಿ || ೧೧ ||

ಸ ಏತಮೇವ ಸೀಮಾನಂ ವಿದರ್ಯೈತಯಾ ದ್ವಾರಾಪ್ರಾ᳚ಪ॒ದ್ಯತ | ಸೈಷಾ ವಿದೃತಿರ್ನಾ॒ಮ ದ್ವಾಸ್ತದೇತನ್ನಾಂದನಂ
ತಸ್ಯ ತ್ರಯ ಆವಸಥಾಸ್ತ್ರಯಃ॑ ಸ್ವ॒ಪ್ನಾ ಅ॒ಯಮಾವಸಥೋಽಯಮಾವಸಥೋಽಯಮಾವಸ॑ಥ ಇ॒ತಿ || ೧೨ ||

ಸ ಜಾತೋ ಭೂತಾನ್ಯಭಿವ್ಯೈ॒ಖ್ಯತ್ ಕಿಮಿಹಾನ್ಯಂ ವಾವದಿಷದಿ॒ತಿ |
ಸ ಏತಮೇವ ಪುರುಷಂ ಬ್ರಹ್ಮ ತತಮಮಪಶ್ಯದಿದಮದ॑ರ್ಶಮಹೋ || ೧೩ ||

ತಸ್ಮಾದಿದಂದ್ರೋ ನಾಮೇದಂದ್ರೋ ಹ ವೈ ನಾಮ | ತಮಿದಂ᳚ದ್ರಂ ಸಂತಮಿಂದ್ರಮಿ॑ತ್ಯಾಚ॒ಕ್ಷತೇ ಪ॒ರೋಕ್ಷೇ᳚ಣ |
ಪ॒ರೋಕ್ಷಪ್ರಿ॑ಯಾ ಇವ ಹಿ ದೇ॒ವಾಃ ಪರೋಕ್ಷಪ್ರಿಯಾ ಇವ॑ ಹಿ ದೇವಾಃ || ೧೪ ||

ದ್ವಿತೀಯೋsಧ್ಯಾಯಃ |

ಪ್ರಥಮಃ ಖಂಡಃ

ಪುರುಷೇ॒ ಹ ವಾ ಅಯಮಾದಿ॒ತೋ ಗ॑ರ್ಭೋ ಭ॒ವತಿ | ಯದೇತದ್ರೇತಸ್ತದೇತತ್ಸರ್ವೇಭ್ಯೋಽಙ್ಗೇಭ್ಯಸ್ತೇಜಃ
ಸಂಭೂತಮಾತ್ಮನ್ಯೇವಾತ್ಮಾನಂ ಬಿಭ॒ರ್ತಿ ತದ್ಯ॒ಯಾ ಸ್ತ್ರಿಯಾಂ ಸಿಂಚತ್ಯ॒ಥೈನಜ್ಜನಯತಿ ತದಸ್ಯ ಪ್ರಥ॑ಮಂ ಜ॒ನ್ಮ || ೧ ||

ತತ್ ಸ್ತ್ರಿಯಾಂ ಆತ್ಮಭೂಯಂ ಗಚ್ಛತಿ ಯಥಾ ಸ್ವಮಂಗಂ ತಥಾ |
ತಸ್ಮಾದೇನಾಂ ನ ಹಿನಸ್ತಿ ಸಾಸ್ಯೈತಮಾತ್ಮಾನಮತ್ರ ಗತಂ ಭಾವಯ॒ತಿ || ೨ ||

ಸಾ ಭಾವಯಿತ್ರೀ ಭಾವಯಿತವ್ಯಾ॑ ಭವತಿ ತಂ ಸ್ತ್ರೀ ಗರ್ಭ᳚ ಬಿಭ॒ರ್ತಿ ಸೋಽಗ್ರ ಏವ ಕುಮಾರಂ ಜನ್ಮನೋಽಗ್ರೇಽಧಿಭಾವಯ॒ತಿ ಸ ಯತ್ಕುಮಾರಂ ಜನ್ಮನೋಽಗ್ರೇಽಧಿಭಾವಯತ್ಯಾತ್ಮಾನಮೇವ ತದ್ಭಾವಯತ್ಯೇಷಾಂ
ಲೋಕಾನಾಂ ಸಂತತ್ಯಾ ಏವಂ ಸಂತತಾ ಹೀ॒ಮೇ ಲೋ॒ಕಾಸ್ತದಸ್ಯ ದ್ವಿತೀ᳚ಯಂ ಜ॒ನ್ಮ || ೩ ||

ಸೋಽಸ್ಯಾಯಮಾತ್ಮಾ ಪುಣ್ಯೇಭ್ಯಃ ಕರ್ಮಭ್ಯಃ ಪ್ರತಿ॑ಧೀಯತೇ | ಅಥಾಸ್ಯಾಽಯಾಮಿತರ ಆ॒ತ್ಮಾ ಕೃತಕೃತ್ಯೋ ವಯೋಗತಃ ಪ್ರೈತಿ ಸ ಇತಃ ಪ್ರಯನ್ನೇವ ಪುನ॑ರ್ಜಾಯತೇ ತದಸ್ಯ ತೃತೀ᳚ಯಂ ಜನ್ಮ || ೪ ||

ತದು॑ಕ್ತಮೃ॒ಷಿಣಾ ಗರ್ಭೇ॒ ನು ಸನ್ನನ್ವೇ᳚ಷಾಮವೇದಮ॒ಹಂ ದೇ॒ವಾನಾಂ॒
ಜನಿ॑ಮಾನಿ॒ ವಿಶ್ವಾ᳚ | ಶ॒ತಂ ಮಾ॒ ಪುರ॒ ಆಯ॑ಸೀರರಕ್ಷ॒ನ್ನಧ॑ ಶ್ಯೇ॒ನೋ ಜ॒ವಸಾ॒ ನಿರ॑ದೀಯಮಿತಿ ಗರ್ಭ ಏವೈತಚ್ಛಯಾನೋ ವಾ॒ಮದೇವ ಏವ॑ಮುವಾ॒ಚ || ೫ ||

ಸ ಏವಂ ವಿದ್ವಾನಸ್ಮಾಚ್ಛರೀರಭೇದಾದೂರ್ಧ್ವಸೂತ್ಕ್ರಮ್ಯಾಮುಷ್ಮಿನ್ ಸ್ವರ್ಗೇ ಲೋಕೇ ಸರ್ವಾನ್ಕಾಮಾನಾಪ್ತ್ವಾಽಮೃತಃ ಸಮಭವ॑ತ್ಸಮ॒ಭವತ್ || ೬ ||

ತೃತೀಯೋsಧ್ಯಾಯಃ |

ಪಂಚಮಃ ಖಂಡಃ

ಕೋಽಯಮಾತ್ಮೇತಿ ವ॒ಯಮುಪಾಸ್ಮಹೇ | ಕತರಃ ಸ ಆತ್ಮಾ | ಯೇನ ವಾ॑ ರೂಪಂ ಪಶ್ಯತಿ ಯೇನ ವಾ॑ ಶಬ್ದಂ ಶೃಣೋತಿ ಯೇನ ವಾ॑ ಗಂಧಾನಾಜಿಘ್ರತಿ ಯೇನ ವಾ॑ ವಾಚಂ ವ್ಯಾಕರೋತಿ ಯೇನ ವಾ॑ ಸ್ವಾದು ಚಾಸ್ವಾದು ಚ ವಿ॑ಜಾನಾ॒ತಿ || ೧ ||

ಯದೇತದ್ ಹೃದಯಂ ಮನಶ್ಚೈತತ್ಸಂಜ್ಞಾನಮಾಜ್ಞಾನಂ ವಿಜ್ಞಾನಂ ಪ್ರಜ್ಞಾನಂ ಮೇಧಾ ದೃ॒ಷ್ಟಿರ್ಧೃತಿರ್ಮತಿರ್ಮನೀಷಾ ಜೂತಿಃ ಸ್ಮೃತಿಃ ಸಂಕಲ್ಪಃ ಕ್ರತುರಸುಃ ಕಾಮೋ ವ॑ಶ ಇ॒ತಿ | ಸರ್ವಾಣ್ಯೇವೈತಾನಿ ಪ್ರಜ್ಞಾನಸ್ಯ ನಾಮಧೇಯಾನಿ॑ ಭವಂ॒ತಿ || ೨ ||

ಏ॒ಷ ಬ್ರಹ್ಮೈಷ ಇಂದ್ರ ಏ॒ಷ ಪ್ರಜಾಪತಿರೇತೇ ಸ॒ರ್ವೇ ದೇವಾ ಇಮಾನಿ ಚ ಪಂಚ ಮಹಾಭೂತಾನಿ ಪೃಥಿವೀ ವಾಯುರಾಕಾಶ ಆಪೋ ಜ್ಯೋತೀಂಷೀತ್ಯೇತಾನೀಮಾನಿ ಚ ಕ್ಷು॒ದ್ರಮಿಶ್ರಾಣೀವ ಬೀಜಾನೀತರಾಣಿ ಚೇತರಾಣಿ ಚಾಂಡಜಾನಿ ಚ ಜರಾಯುಜಾನಿ ಚ ಸ್ವೇದಜಾನಿ ಚೋದ್ಭಿಜ್ಜಾನಿ ಚಾಶ್ವಾ ಗಾವಃ ಪುರುಷಾ ಹಸ್ತಿನೋ ಯತ್ಕಿಂಚೇದಂ ಪ್ರಾಣಿ ಜಂಗಮಂ ಚ ಪತತ್ರಿ ಚ ಯಚ್ಚ ಸ್ಥಾವರಂ ಸರ್ವಂ ತತ್ಪ್ರ॒ಜ್ಞಾನೇತ್ರಂ ಪ್ರ॒ಜ್ಞಾನೇ᳚ ಪ್ರತಿಷ್ಠಿತಂ ಪ್ರ॒ಜ್ಞಾನೇ᳚ತ್ರೋ ಲೋ॒ಕಃ ಪ್ರ॒ಜ್ಞಾ ಪ್ರತಿ॒ಷ್ಠಾ ಪ್ರಜ್ಞಾ᳚ನಂ ಬ್ರಹ್ಮ || ೩ ||

ಸ ಏ॒ತೇನ ಪ್ರಾಜ್ಞೇನಾತ್ಮನಾಽಸ್ಮಾಲ್ಲೋಕಾದುತ್ಕ್ರಮ್ಯಾಮುಷ್ಮಿನ್ಸ್ವರ್ಗೇ
ಲೋಕೇ ಸರ್ವಾನ್ಕಾಮಾನಾಪ್ತವಾಽಮೃತಃ ಸಮಭವ॑ತ್ಸಮ॒ಭವದಿತ್ಯೋಂ || ೪ ||

ಓಂ ವಾಙ್ಮೇ॒ ಮನ॑ಸಿ॒ ಪ್ರತಿ॑ಷ್ಠಿತಾ॒ ಮನೋ᳚ ಮೇ॒ ವಾಚಿ॒
ಪ್ರತಿ॑ಷ್ಠಿತಮಾ॒ವಿರಾ॒ವೀರ್ಮ॑ ಏಧಿ ವೇ॒ದಸ್ಯ ಮ॒ ಆಣೀ᳚ಸ್ಥಃ ಶ್ರು॒ತಂ ಮೇ॒ ಮಾ
ಪ್ರಹಾ᳚ಸೀರ॒ನೇನಾ॒ಧೀತೇ᳚ ನಾಹೋರಾ॒ತ್ರಾನ್ ಸಂದ॑ಧಾಮ್ಯೃ॒ತಂ ವ॑ದಿಷ್ಯಾಮಿ ಸ॒ತ್ಯಂ ವ॑ದಿಷ್ಯಾಮಿ॒ ತನ್ಮಾಮ॑ವತು॒ ತದ್ವ॒ಕ್ತಾರ॑ಮವ॒ತ್ವವ॑ತು॒ ಮಾಮವ॑ತು ವ॒ಕ್ತಾರ॒ಮವ॑ತು ವ॒ಕ್ತಾರಂ᳚ || ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||