ಶ್ರೀಸೂಕ್ತಮ್

ಓಂ ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಂ |
ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ || ೧ ||

ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀಂ᳚ |
ಯಸ್ಯಾಂ॒ ಹಿರ॑ಣ್ಯಂ ವಿಂ॒ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಂ || ೨ ||

ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ᳚ದಪ್ರ॒ಬೋಧಿ॑ನೀಂ |
ಶ್ರಿಯಂ॑ ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ᳚ದೇ॒ವೀರ್ಜು॑ಷತಾಂ || ೩ ||

ಕಾಂ॒ ಸೋ॒ಸ್ಮಿ॒ತಾಂ ಹಿರ॑ಣ್ಯಪ್ರಾ॒ಕಾರಾ॑ಮಾ॒ರ್ದ್ರಾಂ ಜ್ವಲಂ॑ತೀಂ ತೃ॒ಪ್ತಾಂ ತ॒ರ್ಪಯಂ॑ತೀಂ | ಪ॒ದ್ಮೇ॒ ಸ್ಥಿ॒ತಾಂ ಪ॒ದ್ಮವ॑ರ್ಣಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಂ || ೪ ||

ಚಂ॒ದ್ರಾಂ ಪ್ರ॑ಭಾ॒ಸಾಂ ಯ॒ಶಸಾ॒ ಜ್ವಲಂ॑ತೀಂ॒ ಶ್ರಿಯಂ॑ ಲೋ॒ಕೇ ದೇ॒ವಜು॑ಷ್ಟಾಮುದಾ॒ರಾಂ | ತಾಂ ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹಂ ಪ್ರಪ॑ದ್ಯೇಽಲ॒ಕ್ಷ್ಮೀರ್ಮೇ॑ ನಶ್ಯತಾಂ॒ ತ್ವಾಂ ವೃ॑ಣೇ || ೫ ||

ಆ॒ದಿ॒ತ್ಯವ॑ರ್ಣೇ॒ ತಪ॒ಸೋಽಧಿ॑ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ ಬಿ॒ಲ್ವಃ |
ತಸ್ಯ॒ ಫಲಾ᳚ನಿ॒ ತಪ॒ಸಾ ನು॑ದಂತು ಮಾ॒ಯಾಂತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಕ್ಷ್ಮೀಃ || ೬ ||

ಉಪೈ॑ತು॒ ಮಾಂ ದೇ॑ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ |
ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿನ್ ಕೀ॒ರ್ತಿಮೃ॑ದ್ಧಿಂ ದ॒ದಾತು॑ ಮೇ || ೭ ||

ಕ್ಷುತ್ಪಿ॑ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॑ಲ॒ಕ್ಷ್ಮೀಂ ನಾ॑ಶಯಾ॒ಮ್ಯಹಂ |
ಅಭೂ॑ತಿ॒ಮಸ॑ಮೃದ್ಧಿಂ॒ ಚ ಸರ್ವಾಂ॒ ನಿರ್ಣು॑ದ ಮೇ॒ ಗೃಹಾತ್ || ೮ ||

ಗಂ॒ಧ॒ದ್ವಾ॒ರಾಂ ದು॑ರಾಧ॒ರ್ಷಾಂ॒ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀಂ᳚ |
ಈ॒ಶ್ವರೀಂ᳚ ಸರ್ವ॑ಭೂತಾ॒ನಾಂ॒ ತಾಮಿ॒ಹೋಪ॑ಹ್ವಯೇ॒ ಶ್ರಿಯಂ || ೯ ||

ಮನ॑ಸಃ॒ ಕಾಮ॒ಮಾಕೂ᳚ತಿಂ ವಾ॒ಚಃ ಸ॒ತ್ಯಮ॑ಶೀಮಹಿ |
ಪ॒ಶೂ॒ನಾಂ ರೂ॒ಪಮನ್ನ॑ಸ್ಯ॒ ಮಯಿ॒ ಶ್ರೀಃ ಶ್ರ॑ಯತಾಂ॒ ಯಶಃ॑ || ೧೦ ||

ಕ॒ರ್ದಮೇ॑ನ ಪ್ರ॑ಜಾಭೂ॒ತಾ॒ ಮ॒ಯಿ॒ ಸಂಭ॑ವ ಕ॒ರ್ದಮ |
ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ ಮಾ॒ತರಂ॑ ಪದ್ಮ॒ಮಾಲಿ॑ನೀಂ || ೧೧ ||

ಆಪಃ॑ ಸೃ॒ಜಂತು॑ ಸ್ನಿ॒ಗ್ಧಾ॒ನಿ॒ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ |
ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ॑ ವಾ॒ಸಯ॑ ಮೇ ಕು॒ಲೇ || ೧೨ ||

ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ॒ ಪಿಂ॒ಗ॒ಲಾಂ ಪ॑ದ್ಮಮಾ॒ಲಿನೀಂ |
ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ || ೧೩ ||

ಆ॒ರ್ದ್ರಾಂ ಯಃ॒ ಕರಿ॑ಣೀಂ ಯ॒ಷ್ಟಿಂ॒ ಸು॒ವ॒ರ್ಣಾಂ ಹೇ॑ಮಮಾ॒ಲಿನೀಂ |
ಸೂ॒ರ್ಯಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ॒ ಜಾತ॑ವೇದೋ ಮ॒ ಆವ॑ಹ || ೧೪ ||

ತಾಂ ಮ॒ ಆವ॑ಹ॒ ಜಾತ॑ವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀಂ᳚ |
ಯಸ್ಯಾಂ॒ ಹಿ॑ರಣ್ಯಂ॒ ಪ್ರಭೂ॑ತಂ॒ ಗಾವೋ॑ ದಾ॒ಸ್ಯೋಽಶ್ವಾನ್॑, ವಿಂದೇಯಂ॒ ಪುರು॑ಷಾನ॒ಹಂ || ೧೫ ||

ಯಃ ಶುಚಿಃ॒ ಪ್ರಯ॑ತೋ ಭೂ॒ತ್ವಾ ಜು॒ಹುಯಾ᳚ದಾಜ್ಯ॒ ಮನ್ವ॑ಹಂ |
ಶ್ರಿಯಃ॑ ಪಂ॒ಚದ॑ಶರ್ಚಂ॒ ಚ ಶ್ರೀ॒ಕಾಮಃ॑ ಸತ॒ತಂ ಜ॑ಪೇತ್ || ೧೬ ||

....

ಪ॒ದ್ಮಾ॒ನ॒ನೇ ಪ॑ದ್ಮ ಊ॒ರೂ॒ ಪ॒ದ್ಮಾಕ್ಷೀ॑ ಪದ್ಮ॒ಸಂಭ॑ವೇ |
ತ್ವಂ ಮಾಂ᳚ ಭ॒ಜಸ್ವ॑ ಪ॒ದ್ಮಾ॒ಕ್ಷೀ॒ ಯೇ॒ನ ಸೌಖ್ಯಂ ಲ॒ಭಾಮ್ಯ॑ಹಂ ||

ಅಶ್ವ॑ದಾ॒ಯೀ ಚ ಗೋ॑ದಾ॒ಯೀ॒ ಧ॒ನದಾ॑ಯೀ ಮ॒ಹಾಧ॑ನೇ |
ಧನಂ ಮೇ॒ ಜುಷ॑ತಾಂ ದೇ॒ವಿ॒ ಸ॒ರ್ವಕಾ॑ಮಾಂ᳚ಶ್ಚ॒ ದೇ॒ಹಿ॑ ಮೇ ||

ಪ॒ದ್ಮಾ॒ನ॒ನೇ ಪ॑ದ್ಮವಿಪ॒ದ್ಮಪ॑ತ್ರೇ ಪ॒ದ್ಮಪ್ರಿ॑ಯೇ ಪದ್ಮದಲಾಯ॑ತಾಕ್ಷಿ |
ವಿ॒ಶ್ವ॑ಪ್ರಿಯೇ॒ ವಿಷ್ಣು ಮ॒ನೋ॑ಽನುಕೂ॒ಲೇ ತ್ವತ್ಪಾ॑ದಪ॒ದ್ಮಂ ಮ॑ಯಿ॒ ಸನ್ನಿ॑ಧತ್ಸ್ವ ||

ಪುತ್ರಪೌ॒ತ್ರ ಧ॑ನಂ ಧಾ॒ನ್ಯಂ ಹ॒ಸ್ತ್ಯಶ್ವಾ॑ದಿಗ॒ವೇ ರ॑ಥಂ |
ಪ್ರ॒ಜಾ॒ನಾಂ ಭ॑ವಸಿ ಮಾ॒ತಾ ಆ॒ಯುಷ್ಮಂ॑ತಂ ಕ॒ರೋತು॑ ಮಾಂ ||

ಧನ॑ಮ॒ಗ್ನಿರ್ಧ॑ನಂ ವಾ॒ಯುರ್ಧ॑ನಂ॒ ಸೂರ್ಯೋ॑ ಧನಂ॒ ವಸುಃ॑ | ಧನ॒ಮಿಂದ್ರೋ॒ ಬೃಹ॒ಸ್ಪತಿ॒ರ್ವರು॑ಣಂ॒ ಧನ॒ಮಶ್ನು॑ತೇ ||

ವೈನ॑ತೇಯ॒ ಸೋಮಂ॑ ಪಿಬ॒ ಸೋಮಂ॑ ಪಿಬತು ವೃತ್ರ॒ಹಾ |
ಸೋಮಂ॒ ಧನ॑ಸ್ಯ ಸೋ॒ಮಿನೋ॒ ಮಹ್ಯಂ॒ ದದಾ॑ತು ಸೋ॒ಮಿನೀ᳚ ||

ನ ಕ್ರೋಧೋ ನ ಚ॑ ಮಾತ್ಸ॒ರ್ಯಂ ನ॒ ಲೋಭೋ॑ ನಾಶು॒ಭಾ ಮ॑ತಿಃ |
ಭವಂ॑ತಿ॒ ಕೃತ॑ಪುಣ್ಯಾ॒ನಾಂ ಭ॒ಕ್ತಾನಾಂ ಶ್ರೀಸೂ᳚ಕ್ತಂ ಜ॒ಪೇತ್ಸ॑ದಾ ||

ವರ್ಷಂ॑ತು॒ ತೇ ವಿ॑ಭಾವ॒ರಿ॒ದಿ॒ವೋ ಅ॑ಭ್ರಸ್ಯ॒ ವಿದ್ಯು॑ತಃ | ರೋಹಂ॑ತು॒ ಸರ್ವ॑ಬೀ॒ಜಾ॒ನ್ಯ॒ವ ಬ್ರ॑ಹ್ಮ ದ್ವಿ॒ಷೋ ಜ॑ಹಿ ||

ಯಾ ಸಾ ಪದ್ಮಾ॑ಸನ॒ಸ್ಥಾ ವಿಪುಲಕಟಿತಟೀ ಪದ್ಮ॒ಪತ್ರಾ॑ಯತಾ॒ಕ್ಷೀ | ಗಂಭೀರಾ ವ॑ರ್ತನಾ॒ಭಿಃ ಸ್ತನಭರ ನಮಿತಾ ಶುಭ್ರ ವಸ್ತ್ರೋ॑ತ್ತರೀ॒ಯಾ |
ಲಕ್ಷ್ಮೀರ್ದಿ॒ವ್ಯೈರ್ಗಜೇಂದ್ರೈರ್ಮ॒ಣಿಗಣಖಚಿತೈಸ್ಸ್ನಾಪಿತಾ ಹೇ॑ಮಕುಂ॒ಭೈಃ |
ನಿ॒ತ್ಯಂ ಸಾ ಪ॑ದ್ಮಹ॒ಸ್ತಾ ಮಮ ವಸ॑ತು ಗೃ॒ಹೇ ಸರ್ವ॒ಮಾಂಗಲ್ಯ॑ಯುಕ್ತಾ ||

ಲ॒ಕ್ಷ್ಮೀಂ ಕ್ಷೀರಸಮುದ್ರ ರಾಜತನಯಾಂ ಶ್ರೀ॒ರಂಗಧಾಮೇ॑ಶ್ವರೀಂ |
ದಾ॒ಸೀಭೂತಸಮಸ್ತ ದೇವ ವ॒ನಿತಾಂ ಲೋ॒ಕೈಕ॒ ದೀಪಾಂ॑ಕುರಾಂ |
ಶ್ರೀಮನ್ಮಂದಕಟಾಕ್ಷಲಬ್ಧ ವಿಭವ ಬ್ರ॒ಹ್ಮೇಂದ್ರ ಗಂಗಾ॑ಧರಾಂ |
ತ್ವಾಂ ತ್ರೈ॒ಲೋಕ್ಯ॒ ಕುಟುಂ॑ಬಿನೀಂ ಸ॒ರಸಿಜಾಂ ವಂದೇ॒ ಮುಕುಂ॑ದಪ್ರಿಯಾಂ ||

ಸಿ॒ದ್ಧ॒ಲ॒ಕ್ಷ್ಮೀರ್ಮೋ॑ಕ್ಷಲ॒ಕ್ಷ್ಮೀ॒ರ್ಜ॒ಯಲ॑ಕ್ಷ್ಮೀಸ್ಸ॒ರಸ್ವ॑ತೀ |
ಶ್ರೀಲಕ್ಷ್ಮೀರ್ವ॑ರಲ॒ಕ್ಷ್ಮೀ॒ಶ್ಚ॒ ಪ್ರ॒ಸನ್ನಾ ಭ॑ವ ಸ॒ರ್ವದಾ ||

ವರಾಂಕುಶೌ ಪಾಶಮಭೀ॑ತಿಮು॒ದ್ರಾಂ॒ ಕ॒ರೈರ್ವಹಂತೀಂ ಕ॑ಮಲಾ॒ಸನಸ್ಥಾಂ |
ಬಾಲಾರ್ಕ ಕೋಟಿ ಪ್ರತಿ॑ಭಾಂ ತ್ರಿ॒ಣೇ॒ತ್ರಾಂ॒ ಭ॒ಜೇಹಮಾದ್ಯಾಂ ಜ॑ಗದೀ॒ಶ್ವರೀಂ ತಾಂ ||

ಸ॒ರ್ವ॒ಮಂ॒ಗ॒ಲಮಾಂ॒ಗಲ್ಯೇ॑ ಶಿ॒ವೇ ಸ॒ರ್ವಾರ್ಥ॑ ಸಾಧಿಕೇ |
ಶರ॑ಣ್ಯೇ ತ್ರ್ಯಂಬ॑ಕೇ ದೇ॒ವಿ॒ ನಾ॒ರಾಯ॑ಣಿ ನ॒ಮೋಽಸ್ತು॑ ತೇ ||

ಸರಸಿಜನಿಲಯೇ ಸರೋ॑ಜಹ॒ಸ್ತೇ ಧವಲತರಾಂ ಶುಕಗಂಧಮಾ᳚ಲ್ಯ ಶೋ॒ಭೇ |
ಭಗವತಿ ಹರಿವಲ್ಲಭೇ॑ ಮನೋ॒ಜ್ಞೇ ತ್ರಿಭುವನಭೂತಿಕರಿಪ್ರ॑ಸೀದ ಮ॒ಹ್ಯಂ ||

ವಿಷ್ಣು॑ಪ॒ತ್ನೀಂ ಕ್ಷ॑ಮಾಂ ದೇ॒ವೀಂ॒ ಮಾ॒ಧವೀಂ ಮಾ॑ಧವ॒ಪ್ರಿ॑ಯಾಂ |
ವಿಷ್ಣೋಃ॑ ಪ್ರಿ॒ಯಸ॑ಖೀಂ ದೇ॒ವೀಂ॒ ನ॒ಮಾ॒ಮ್ಯಚ್ಯು॑ತವ॒ಲ್ಲಭಾಂ ||

ಮ॒ಹಾ॒ಲಕ್ಷ್ಮೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನ್ಯೈ ಚ॑ ಧೀಮಹೀ | ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್ ||

ಶ್ರೀ॒ವರ್ಚ॑ಸ್ಯ॒ಮಾಯು॑ಷ್ಯ॒ಮಾರೋ᳚ಗ್ಯ॒ಮಾವಿ॑ಧಾ॒ತ್ ಪವ॑ಮಾನಂ ಮಹೀ॒ಯತೇ᳚ | ಧ॒ನಂ ಧಾ॒ನ್ಯಂ ಪ॒ಶುಂ ಬ॒ಹುಪು॑ತ್ರಲಾ॒ಭಂ ಶ॒ತಸಂ॑ವತ್ಸ॒ರಂ ದೀ॒ರ್ಘಮಾಯುಃ॑ ||

ಋಣರೋಗಾದಿದಾರಿದ್ರ್ಯಪಾ॒ಪಕ್ಷು॑ದ॒ಪಮೃತ್ಯ॑ವಃ | ಭಯ॑ಶೋ॒ಕಮ॑ನಸ್ತಾ॒ಪಾ ನ॒ಶ್ಯಂತು॑ ಮಮ॒ ಸರ್ವ॑ದಾ ||

ಶ್ರಿಯೇ॑ ಜಾ॒ತ ಶ್ರಿಯ॒ ಆನಿರಿ॑ಯಾಯ॒ ಶ್ರಿಯಂ॒ ವಯೋ᳚ ಜನಿ॒ತೃಭ್ಯೋ᳚ ದಧಾತಿ |
ಶ್ರಿಯಂ॒ ವಸಾ᳚ನಾ ಅಮೃತ॒ತ್ವಮಾ᳚ಯ॒ನ್ ಭಜಂ᳚ತಿ ಸ॒ತ್ಯಾ ಸ॑ಮಿ॒ಥಾ ಮಿ॒ತದ್ರೌ᳚ ||

ಶ್ರಿ॒ಯ॒ ಏ॒ವೈ॒ನಂ॒ ತಚ್ಛ್ರಿ॒ಯಾಮಾ᳚ದಧಾ॒ತಿ | ಸಂ॒ತ॒ತ॒ಮೃ॒ಚಾ ವ॑ಷಟ್ಕೃ॒ತ್ಯಂ
ಸಂತತ್ಯೈ᳚ ಸಂಧೀ॒ಯತೇ ಪ್ರಜ॑ಯಾ ಪ॒ಶುಭಿ॒ರ್ಯ ಯ ಏ᳚ವಂ ವೇ॒ದ ||

ಓಂ ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನ್ಯೈ ಚ॑ ಧೀಮಹಿ | ತನ್ನೋ॑ ಲಕ್ಷ್ಮೀಃ ಪ್ರಚೋ॒ದಯಾ᳚ತ್ ||

ಓಂ ಶಾಂತಿಃ॒ ಶಾಂತಿಃ॒ ಶಾಂತಿಃ॑ ||