ಪ್ರಕೃತಿಂ ಪರಮಾಮಭಯಂ ವರದಾಂ

ಪ್ರಕೃತಿಂ ಪರಮಾಮಭಯಂ ವರದಾಂ
ನರರೂಪಧರಾಂ ಜನತಾಪಹಾರಾಮ್ |
ಶರಣಾಗತ-ಸೇವಕ-ತೋಷಕರೀಮ್
ಪ್ರಣಮಾಮಿ ಪರಾಂ ಜನನೀಮ್ ಜಗತಾಮ್ ||

ಗುಣಹೀನ-ಸುತಾನಪರಾಧಯುತಾನ್
ಕೃಪಯಾದ್ಯ ಸಮುದ್ಧರ ಮೋಹಗಾತನ್ |
ತರಣೀಂ ಭವಸಾಗರ-ಪಾರಕರೀಂ
ಪ್ರಣಮಾಮಿ ಪರಾಂ ಜನನೀಮ್ ಜಗತಾಮ್ ||

ವಿಷಯಂ ಕುಸುಮಂ ಪರಿಹೃತ್ಯ ಸದಾ
ಚರಣಾಂಬುರುಹಾಮೃತ-ಶಾಂತಿ-ಸುಧಾಮ್ |
ಪಿಬ ಭೃಂಗಮನೋ ಭವರೋಗಹರಂ
ಪ್ರಣಮಾಮಿ ಪರಾಂ ಜನನೀಮ್ ಜಗತಾಮ್ ||

ಕೃಪಾಂ ಕುರು ಮಹಾದೇವಿ ಸುತೇಷು ಪ್ರಣತೇಷು ಚ |
ಚರಣಾಶ್ರಯದಾನೇನ ಕೃಪಮಾಯಿ ನಮೋಸ್ತು ತೇ ||

ಲಜ್ಜಾಪಟಾವೃತೇ ನಿತ್ಯಂ ಶಾರದೇ ಜ್ಞಾನದಾಯಿಕೆ |
ಪಾಪೆಭ್ಯೋ ನಃ ಸದಾ ರಕ್ಷ ಕೃಪಮಾಯಿ ನಮೋಸ್ತುತೇ ||

ರಾಮಕೃಷ್ಣಗತಪ್ರಾಣಂ ತನ್ನಾಮಶ್ರವಣಪ್ರಿಯಾಮ್ |
ತದ್ಭಾವರಂಜಿತಾಕಾರಾಂ ಪ್ರಣಮಾಮಿ ಮುಹುರ್ಮುಹುಃ ||

ಪವಿತ್ರಂ ಚರಿತಂ ಯಸ್ಯಾಃ ಪವಿತ್ರಂ ಜೀವನಂ ತಥಾ |
ಪವಿತ್ರತಾಸ್ವರೂಪಿಣ್ಯೈ ತಸ್ಯೈ ಕುರ್ಮೋ ನಮೋ ನಮಃ ||

ದೇವೀಂ ಪ್ರಸನ್ನಾಂ ಪ್ರಣತಾರ್ತಿಹಂತ್ರೀಂ
ಯೋಗೀಂದ್ರಪೂಜ್ಯಂ ಯುಗಧರ್ಮಪಾತ್ರೀಮ್ |
ತಾಂ ಶಾರದಾಂ ಭಕ್ತಿ-ವಿಜ್ಞಾನ-ದಾತ್ರೀಂ
ದಯಾಸ್ವರೂಪಾಂ ಪ್ರಣಮಾಮಿ ನಿತ್ಯಮ್ ||

ಸ್ನೇಹೇನ ಬಧ್ನಾಸಿ ಮನೋಸ್ಮದೀಯಂ
ದೋಷಾನಶೇಷಾನ್ ಸಗುಣೀಕರೋಷಿ |
ಅಹೇತುನಾ ನೋ ದಯಸೇ ಸದೋಷಾನ್
ಸ್ವಾಂಕೇ ಗೃಹೀತ್ವಾ ಯದಿದಂ ವಿಚಿತ್ರಮ್ ||

ಪ್ರಸೀದ ಮಾತರ್ವಿನಯೇನ ಯಾಚೇ
ನಿತ್ಯಂ ಭವ ಸ್ನೇಹವತೀ ಸುತೇಷು |
ಪ್ರೇಮೈಕಬಿಂದುಂ ಚಿರದಗ್ದಚಿತ್ತೇ
ವಿಷಿಂಚ ಚಿತ್ತಂ ಕುರು ನಃ ಸುಶಾಂತಮ್ ||

ಜನನೀಂ ಶಾರದಾಂ ದೇವೀಂ ರಾಮಕೃಷ್ಣಂ ಜಗದ್ಗುರುಮ್ |
ಪಾದಪದ್ಮೇ ತಯೋಃ ಶ್ರಿತ್ವಾ ಪ್ರಣಮಾಮಿ ಮುಹುರ್ಮುಹುಃ||

--ಸ್ವಾಮಿ ಅಭೇದಾನಂದ