ಆನೆ ಬಂದಿದೆ ಇದಿಗೊ ಮದ್ದಾನೆ 

ಆನೆ ಬಂದಿದೆ ಇದಿಗೊ ಮದ್ದಾನೆ ||ಪ||
ಜ್ಞಾನಿಗಳೊಳಾಡುವ ಮದ್ದಾನೆ ||ಅ||

ದೇವಕಿಯೊಳು ಪುಟ್ಟಿದಾನೆ- ವಸು
ದೇವನ ಪೆಸರೊಳೈತಂದ ಮದ್ದಾನೆ
ಶ್ರೀ ವಾಸುದೇವನೆಂಬಾನೆ- ಗೋಪಿ
ದೇವಿಯ ಗೃಹದೊಳಾಡುವ ಪುಟ್ಟಾನೆ ||1||

ನೀಲವರ್ಣದ ನಿಜದಾನೆ- ಸ್ವರ್ಣ
ಮಾಲೆಗಳಿಟ್ಟು ಮೆರೆವ ಚಲುವಾನೆ
ಶ್ರೀಲೋಲನೆನಿಪ ಪಟ್ಟದಾನೆ- ದುಷ್ಟ
ಕಾಳಿಂಗನ ಪೆಡೆಯ ಮೆಟ್ಟಿ ತುಳಿದಾನೆ ||2||

ಬಾಲೇಂದು ಮುಖದ ಮರಿಯಾನೆ- ಕದ್ದು
ಪಾಲನ್ನು ಕುಡಿದ ಮರಿಯಾನೆ
ಕೈಲಿ ಗಿರಿಯನೆತ್ತಿದಾನೆ
ಕಾಳ್ಗಿಚ್ಚನ್ನು ನುಂಗಿದ ಪಟ್ಟದಾನೆ ||3||

ಧೇನುಕಾಸುರನ ಕೊಂದಾನೆ
ತನಗೆ ಜೋಡಿಲ್ಲದಿಹ ನಿಜದಾನೆ
ಮಾನವರಿಗೆಲ್ಲ ಸಿಲ್ಕದಾನೆ
ಶೌನಕಾದಿಗಳೊಂದಿಗಿಪ್ಪಾನೆ ||4||

ಮಲ್ಲರೊಡನೆ ಗೆಲಿದಾನೆ- ಕಡು
ಖುಲ್ಲ ಕಂಸನ ಕೆಡಹಿದಾನೆ- ವಿದ್ಯೆ ಸಾಂದೀಪ
ರಲಿ ಕಲಿತ ಮರಿಯಾನೆ
ಸಲೆ ಭಕ್ತರ ಕಾವ ಪುಟ್ಟಾನೆ ||5||

ತರಳೆ ರುಕ್ಮಿಣಿಯ ತಂದಾನೆ- ಬಹು
ಕರುಣದಿಂ ಪಾಂಡವರ ಪೊರೆದಾನೆ
ವರ ವೇಲಾಪುರದೊಳಿಪ್ಪಾನೆ
ಸಿರಿಯಾದಿಕೇಶವನೆಂಬ ಮದ್ದಾನೆ ||6||