ಜಯತು ಜಯತು ರಾಮಕೃಷ್ಣ

ಜಯತು ಜಯತು ರಾಮಕೃಷ್ಣ ಜಯತು ಭುವನಮಂಗಲ
ಜಯತು ತಾಯಿ ಮಹಾಮಾಯಿ ಶಾರದೇ ಸುನಿರ್ಮಲ |
ಜಯತು ಶ್ರೀವಿವೇಕಾನಂದ ತಮವ ಕಳೆವ ಭಾಸ್ಕರ
ಶ್ರೀಗುರುವಿನ ಆತ್ಮಪುತ್ರ ಬ್ರಹ್ಮಾನಂದ ಸಾಗರ ||

ಜಯತು ಜಯತು ಪ್ರೇಮಾನಂದ - ಪ್ರೇಮಾಮೃತ ಸಿಂಚನ
ತ್ಯಾಗವ್ರತನೆ ಶಿವಾನಂದ ಗುರುಶಕ್ತಿಯ ದರ್ಶನ |
ಕಾಮನೆಗಳ ಗೆದ್ದ ಯೋಗಿ ಜಯತು ಯೋಗಾನಂದನೆ
ಧೀರ - ವೀರ ನಿರಂಜನನೆ ನಿನ್ನ ಪಾದಕೆ ವಂದನೆ ||

ಗುರುಸೇವೆಯ ಮೂರ್ತರೂಪ ರಾಮಕೃಷ್ಣಾನಂದನೆ
ಅಕ್ಷರದಲಿ ನೆಲೆನಿಂದಿಹ ಅದ್ಭುತ ಆನಂದನೆ |
ತಾಪಸಿ ನೀ ಅಭೇದಾನಂದ ಜ್ಞಾನಮೂರ್ತಿ ಜಯ ಜಯ
ದೇಹಭಾವವಳಿದ ಯತಿ ತುರೀಯಾನಂದ ನಿರ್ಭಯ ||

ತಾಯ ಹಿತವ ಸತತ ಕಾಯ್ದ ಶರಚ್ಚಂದ್ರ ವಾಸುಕಿ
ಗಂಗಾಧರನೆ ಜೀವಸೇವೆಯಲ್ಲಿ ಶಿವನ ಸಮ್ಮುಖಿ |
ಜಯತು ಜಯತು ಹರಿಪ್ರಸನ್ನ ಪ್ರಸನ್ನಾತ್ಮ ಸಂತತ
ಶ್ರೀಗೋಪಾಲ ನಿನ್ನ ಇರವೆ ತಾಯ ಚರಣಕರ್ಪಿತ ||

ಬಾಲಕನೊಲು ಸರಳ-ಶಾಂತ ಶ್ರೀಸುಬೋಧಾನಂದನೆ
ತಾಯ ಪದದಿ ತನ್ಮಯ ನೀ ಶಾರದಾಪ್ರಸನ್ನನೆ |
ಕಥಾಮೃತದ ಹೊನಲ ತಂದ ಗುಪ್ತ ಶ್ರೀಮಹೇಂದ್ರನೆ
ಶ್ರದ್ದೆಬಲದಿ ಕೊಳೆಯ ತೊಳೆದ ಶ್ರೀಗಿರೀಶಚಂದ್ರನೆ ||

ತ್ಯಾಗದುರಿಯ ಹೆಡೆಯೆತ್ತಿದ ದುರ್ಗಾಚರಣನಾಗನೆ
ಸೇವೆಯಲ್ಲೆ ಸಾರ್ಥಕತೆಗೆ ಸಂದಿಹ ಬಲರಾಮನೆ |
ನಿಮ್ಮ ನೆನಹು ನಮ್ಮ ಮನವ ಬೆಳಗುತಿರಲಿ ಸರ್ವದಾ
ನೀವೆ ನಮ್ಮ ನಿತ್ಯಸ್ಫೂರ್ತಿ - ಸತ್ಯಸಿರಿಯ ಸಂಪದ ||